Nintendo njoftoi të enjten se është duke punuar për të ofruar Virtual Game Cards, një shërbim që i bën lojërat e shkarkuara në mënyrë dixhitale lehtësisht të aksesueshme nëpër pajisje të ndryshme.
Me Nintendo Switch 2 të shumëpritur në horizont, këto karta lojërash virtuale do ta bëjnë më të lehtë për përdoruesit që të transferojnë lojërat e tyre ekzistuese Switch në pajisjet e tyre të reja. Për momentin, lojërat Switch mund të blihen ose si një kartë lojërash fizike tradicionale – ose si një version dixhital.
Ndërsa kartat fizike të lojërave mund të nxirren dhe rifuten lehtësisht në një Switch tjetër për të luajtur nga një konsolë tjetër, shkarkimet dixhitale kanë qenë pak më të vështira për t’u transferuar nga pajisja në pajisje. Megjithatë kjo gjë pritet të ndryshojë në fund të muajit prill.
Virtual Game Cards kanë për qëllim t’i bëjnë lojërat dixhitale të funksionojnë më shumë si ato fizike. Lojtarët mund të lëvizin lehtësisht lojërat midis dy pajisjeve, për sa kohë që ata lidhen lokalisht herën e parë që transferohet një lojë. Virtual Game Cards vijnë gjithashtu me funksionalitetin për t’i ndarë këto lojëra me këdo që është pjesë e Nintendo Family Group, i cili përfshin deri në 8 persona, nëpërmjet Wi-Fi lokal.
Loja mund të huazohet për një periudhë kohore 14-ditore, dhe pas kësaj periudhe lojërat i kthehen automatikisht huadhënësit. Ndërsa nuk ka ende asnjë fjalë zyrtare se kur do të dalë Switch 2, fansat mezi presin më shumë informacion rreth konsolës në eventin e Nintendo Direct të planifikuar për në datën 2 Prill.
