iOS 26 sjell një aplikacion të ri për të gjithë përdoruesit e Apple Games, një aplikacion i dedikuar që shërben si qendër e vetme për të gjithë përvojën e lojërave në ekosistemin Apple. Apple e përshkruan atë si “një shtëpi të personalizuar për lojërat dhe për të luajtur me miqtë”, duke reflektuar rëndësinë gjithnjë në rritje të iPhone-it si platformë lojërash.
Apple Games është i disponueshëm në iPhone, iPad dhe Mac dhe organizon përmbajtjen në pesë seksione kryesore: Home, Arcade, Friends, Library dhe Search. Seksioni Home ofron një përvojë të ngjashme me aplikacionet e tjera të Apple, duke shfaqur lojërat e luajtura së fundmi, sugjerime të personalizuara dhe aktivitetin e miqve. Arcade është i fokusuar te Apple Arcade, shërbimi me mbi 200 lojëra pa reklama dhe pa blerje brenda aplikacionit, i disponueshëm me abonim mujor ose përmes Apple One.
Tabi Friends shfaq aktivitetin e Game Center, duke lejuar përdoruesit të ndjekin progresin e miqve dhe të nisin sfida lojërash. Library përmbledh të gjitha lojërat e instaluara në pajisje dhe përfshin filtra të avancuar, të përmirësuar më tej me përditësimin iOS 26.2, si dhe arritje dhe evente të lojërave. Ndërkohë, Search mundëson kërkim të drejtpërdrejtë dhe eksplorim sipas kategorive si Multiplayer, Action, Family, Puzzle apo Music.
Me iOS 26.2, Apple Games ofron edhe mbështetje të përmirësuar për përdorimin e controllers, duke lehtësuar procesin e luajtjes së lojërave.
Apple Games është veçanërisht i dobishëm për përdoruesit me biblioteka të mëdha lojërash dhe për ata që vlerësojnë aspektin social të lojërave. Ndërsa shumë funksione ekzistonin më parë në App Store, aplikacioni i ri i bashkon ato në një hapësirë më të organizuar dhe të fokusuar te lojërat.
