Pamjet e publikuara në shtator të vitit të kaluar bënë xhiron e internetit dhe tronditën industrinë e videolojrave. Pikërisht në datën 18 shtator 2022, hakeri “teapotuberhacker” publikoi disa video të ndryshme që ishin fragmente reale nga loja Grand Theft Auto VI, madje ofroi dhe të shiste source code të GTA V.
Disa ditë më vonë u zbulua se hakeri ishte një djalë adoleshent nga Londra me origjinë shqiptare, Arion Kurtaj. Rockstar Games dhe kompania e saj mëmë, Take-Two Interactive, vendosi menjëherë që të merrte masa ligjore kundrejt kësaj ngjarje.
Pas hetimeve më të gjëra u zbulua se adoleshenti me prejardhje shqiptare kishte kryer dhe sulme të tjera kibernetike, që përfshijnë kompani të mëdha si Uber, Nvidia, City of London Police dhe Revolut.
Në internet ka qarkulluar kjo fotografi që mendohet se është e Arion Kurtaj, i cili është akuzuar për 12 krime: 3 raste shantazhi, 2 raste mashtrimim dhe 6 raste që përfshijnë aktin e keqpërdorimit të kompjuterave. Sipas palës paditëse, Arion Kurtaj jo vetëm që hakoi serverat e Rockstar Games dhe publikoi videot e gameplay të GTA VI, por kërcënoi kompaninë se do të publikonte dhe source code të lojës.
Megjithatë mjekët psikiatër kanë deklaruar se ky adoleshent nuk është në gjendjen e duhur mendore për të qenë pjesë e këtyre hetimeve. Arioni është një djalë 18 vjeçar, pjesë e grupit të hakerave të quajtur “Lapsus$”. Raportimet tregojnë se ai kishte një mik me të cilin bashkëpunonte, i cili ishte një vit më i vogël.
