Një studim i ri i kryer në shkallë globale tregon se të rinjtë po ndihen më pak të lumtur se gjeneratat e vjetra pasi vuajnë “ekuivalentin e një krize të moshës së mesme“, ndërsa mjekët paralajmërojnë se “të rinjtë me të vërtetë po hasin vështirësi“.
Dr Vivek Murthy, kirurgu i përgjithshëm amerikan, tha se lejimi i fëmijëve të përdorin mediat sociale ishte si t’u japësh atyre ilaçe që nuk janë provuar të jenë të sigurta. Ai tha se dështimi i qeverive për të rregulluar më mirë mediat sociale në vitet e fundit ishte “çmenduri“. Të dhënat e reja zbuluan se të rinjtë në të gjithë Amerikën e Veriut tani ishin më pak të lumtur se të prindërit e tyre, me të njëjtin ndryshim “historik” që pritet të pasojë në Evropën Perëndimore.
Rënia e mirëqenies në mesin e moshave nën 30 vjeç e ka nxjerrë SHBA-në nga lista e top 20 vendeve më të lumtura, zbuloi 2024 World Happiness Report. Pas 12 vitesh në të cilat njerëzit e moshës 15 deri në 24 u matën si më të lumtur se gjeneratat e vjetra në SHBA, tendenca duket se ka ndryshuar në vitin 2017. Hendeku është ngushtuar gjithashtu në Evropën Perëndimore dhe i njëjti ndryshim mund të ndodhë në vitin e ardhshëm ose dy, sipas parashikimeve.
Murthy i përshkroi zbulimet e raportit si një “flamur të kuq që tregon se të rinjtë me të vërtetë po luftojnë në SHBA dhe tani gjithnjë e më shumë në mbarë botën“. Ai tha se ishte ende duke pritur të shihte të dhëna që vërtetonin se platformat e mediave sociale ishin të sigurta për fëmijët dhe adoleshentët dhe bëri thirrje për veprim ndërkombëtar për të përmirësuar lidhjet sociale në jetën reale për të rinjtë.
Raporti Botëror i Lumturisë, një barometër vjetor i mirëqenies në 140 kombe tregoi “rënie shqetësuese [në lumturinë e të rinjve] veçanërisht në Amerikën e Veriut dhe Evropën Perëndimore“, tha Prof. Jan-Emmanuel De Neve, drejtor i Qendrës Kërkimore të Mirëqenies dhe redaktor i studimit. “Të mendosh se në disa pjesë të botës fëmijët tashmë po përjetojnë ekuivalentin e një krize të moshës së mesme, kërkon veprim të menjëhershëm të politikave,” tha ai.
