Një shpërthim i rrallë kozmik pritet të ndodhë në Rrugën e Qumështit në muajt e ardhshëm – një shpërthim kaq i ndritshëm sa një yll “i ri” me sa duket do të shfaqet për një kohë të shkurtër në qiellin e natës. Ngjarja, e njohur si një nova, do të jetë një mundësi që vjen një herë në jetë për personat në Hemisferën Veriore, sipas NASA-s, sepse llojet e sistemeve yjore në të cilat ndodhin shpërthime të tilla nuk janë të zakonshme në galaktikën tonë.
Shpërthimi i yjeve do të ndodhë në një sistem të quajtur T Coronae Borealis, i cili është 3000 vite dritë larg nga Toka. Ai përmban dy yje: një yll të vdekur, i njohur gjithashtu si një “xhuxh i bardhë“, i rrethuar nga afër nga një gjigant i kuq. Gjigantët e kuq janë yje që po vdesin, të cilëve u mbaron karburanti i hidrogjenit në bërthamat e tyre; dielli në sistemin tonë diellor përfundimisht do të bëhet një i tillë në të ardhmen, sipas NASA-s.
Në sisteme si T Coronae Borealis, dy yjet janë aq afër njëri-tjetrit sa që lënda nga gjigandi i kuq derdhet vazhdimisht në sipërfaqen e xhuxhit të bardhë. Me kalimin e kohës, kjo krijon presion dhe nxehtësi, duke shkaktuar përfundimisht një shpërthim.
“Ndërsa materia grumbullohet në sipërfaqen e xhuxhit të bardhë, ajo nxehet dhe do të ketë presion gjithnjë e më të lartë deri në shpërthim,” tha Bradley Schaefer, një profesor i fizikës dhe astronomisë në Universitetin Shtetëror të Luizianës. Ai e krahasoi shpërthimin nova me një bombë hidrogjeni që shpërthen në hapësirë, duke shtuar se topi i zjarrit që rezulton është në thelb ajo që njerëzit do të jenë në gjendje të shohin nga Toka vëzhguesit e qiellit.
Në kulmin e tij, shpërthimi duhet të jetë i dukshëm me sy të lirë, tha Schaefer: “Do të jetë i ndritshëm në qiell, kështu që do të jetë lehtësisht i dukshëm nga oborri juaj“. Astronomët parashikojnë se shpërthimi nova mund të ndodhë në çdo kohë nga tani deri në shtator. Hera e fundit që ky sistem i veçantë yjor shpërtheu ishte në vitin 1946, tha Schaefer, dhe një tjetër shpërthim ka të ngjarë të mos ndodhë për 80 vjet apo më shumë.
Astronomët në mbarë botën po monitorojnë aktivitetin në sistemin T Coronae Borealis. Sapo të zbulohet një shpërthim, tha Schaefer, pamjet më të mira dhe më të ndritshme ka të ngjarë të vijnë brenda 24 orëve, kur të arrijë afërsisht të njëjtin shkëlqim si Ylli i Veriut. Shpërthimi mund të mbetet i dukshëm me sy të lirë për disa ditë përpara se të fillojë të zbehet. Edhe pasi të zbehet, shikuesit e qiellit ka të ngjarë të jenë ende në gjendje të dallojnë shpërthimin për rreth një javë duke përdorur dylbi, sipas NASA-s.
