Banorët e një zone rezidenciale në Fayetteville, Georgia, janë revoltuar pasi zbuluan se një qendër e madhe të dhënash kishte konsumuar afro 113 milionë litra ujë pa u faturuar fillimisht. Problemi doli në pah vitin e kaluar, kur banorët e lagjes Annelise Park vunë re rënie të pazakontë të presionit të ujit në shtëpitë e tyre.
Pas hetimit, sistemi i ujësjellësit të Fayette County zbuloi dy lidhje industriale që furnizonin një kampus qendre të dhënash, rreth 40 km në jug të Atlantës. Njëra lidhje ishte instaluar pa dijeninë e autoriteteve, ndërsa tjetra nuk ishte e lidhur me llogarinë e kompanisë dhe për rrjedhojë nuk ishte faturuar. Zhvilluesi, Quality Technology Services (QTS), rezultoi se i detyrohej rreth $147,000 për mbi 113 milionë litra ujë, një sasi që mund të mbushë 44 pishina olimpike.
Sipas një letre zyrtare të 15 majit 2025, uji i papaguar ishte përdorur për disa muaj, megjithëse ka mospërputhje mbi kohëzgjatjen e saktë. QTS i shleu pagesat sapo u njoftua, duke e atribuar problemin një ngatërrimi procedural gjatë kalimit të sistemit të ujësjellësit në matësa inteligjentë. Autoritetet lokale konfirmuan se tani konsumi po monitorohet siç duhet dhe nuk u vendos asnjë gjobë ndaj kompanisë.
Ngjarja u bë publike pasi një banor siguroi dokumentin përmes një kërkese zyrtare dhe e publikoi në rrjete sociale, duke nxitur zemërim të gjerë. Kampusi i Fayetteville është një nga zhvillimet më të mëdha të këtij lloji në SHBA, me 615 hektarë dhe plane për deri në 16 ndërtesa. Edhe pse pritet të gjenerojë dhjetëra miliona dollarë taksa, shkalla e tij dhe kërkesa për ujë e energji kanë shtuar kundërshtimet lokale. Madje, këshilli bashkiak ka ndaluar ndërtimin e qendrave të reja të të dhënave në qytet.
Situata është bërë edhe më e ndjeshme pasi Georgia po përballet me thatësirë dhe zjarre masive, ndërkohë që banorëve u kërkohet të kursejnë ujë. Kritikat janë përforcuar nga fakti që QTS, e zotëruar nga Blackstone, nuk u penalizua, gjë që sipas ekspertëve si Gregory Pierce është e pazakontë dhe tregon ndikimin në rritje të qendrave të të dhënave mbi burimet lokale të ujit.
