Shtëpia luksoze e modës Prada dhe kompania komerciale e hapësirës Axiom Space kanë zbuluar kostumet e rinj hapësinor që janë dizenjuar për t’u përdorur në misionin Artemis III të NASA-s. Të zbuluara gjatë International Astronautical Congress në Milano të mërkurën, kostumet kryesisht të bardha përfshijnë gjithashtu disa thekse gri nëpër bërryla dhe gjunjë.
Edhe pse dukshëm pa marka apo logo, dizajnet përfshijnë dhe vija të kuqe, si dhe “çantën e shpinës të sistemit portativ të jetës”, të cilat vijnë nga nën-marka e Prada, Linea Rossa. “Ky është një partneritet novator,” tha Russel Ralston, nënkryetar ekzekutiv i Axiom Space, gjatë konferencës për shtyp. “Ne po përziejmë inxhinierinë, shkencën dhe artin.”
Kostumet me pamje të shkëlqyeshme përfshijnë një sërë veçorish inovative. Astronautët do të jenë në gjendje të ecin në hapësirë për të paktën tetë orë në ditë për shkak të çizmeve të projektuara posaçërisht. Kostumet do të bëhen në një material të bardhë në gjendje të pasqyrojnë nxehtësinë, duke ofruar mbrojtje nga temperaturat jashtëzakonisht të larta dhe pluhuri hënor, sipas një njoftimi të përbashkët për shtyp.
Lëvizshmëria është përmirësuar gjithashtu që nga dizajnet e Apollo 17. Por ishte njohuria e thellë e Prada-s për prodhimin e tekstilit dhe teknikat e qepjes që ndihmuan në “kapërcimin e hendekut” midis funksionalitetit dhe stilit, thuhet në njoftim.
Kostumet – të cilat janë të njëjta për të dyja gjinitë dhe vijnë vetëm me 1 masë që i përshtatet të gjithëve – kanë disa vite që përgatiten për prodhim. Sipas Lorenzo Bertelli, shefi i marketingut i Prada Group, shtëpia e modës ka diskutuar për bashkëpunimin që përpara se të godiste pandemia Covid-19 në vitin 2020. Rreth 10 punonjës të Prada punonin për kostumin hapësinor, duke udhëtuar midis Milanos dhe bazës së Axiom në Huston.
I planifikuar aktualisht për gjysmën e dytë të vitit 2026, misioni Artemis III i NASA-s planifikon të jetë zbarkimi i parë i astronautëve në Hënë që nga Apollo 17 në 1972. Nëse është i suksesshëm, mund të jetë gjithashtu hera e parë që një grua ecën në Hënë.
