Dizenjuesja e veshjeve të femrave në Zara, Vanessa Perilman, po përballet me kritika të shumta për një mesazh jashtëzakonisht ofendues në Instagram që ajo i dërgoi një modeli palestinez në vitin 2021.
Me prezantimin e një fushate reklamimi të re që ka nxitur shumë polemika kundrejt Zara, ku shfaqen imazhe në lidhje me konfliktin aktual Izrael-Palestinë, mesazhi i vjetër i Perilman për Qaher Harhash u zbulua nga përdoruesit e internetit që kërkuan bojkotimin e markës.
Vanessa Perilman i tha Harhash në një mesazh privat në Instagram, një mbështetësi palestinez: “Ndoshta nëse njerëzit tuaj do të ishin të arsimuar, atëherë ata nuk do të hidhnin në erë spitalet dhe shkollat për të cilat Izraeli ndihmoi për të paguar në Gaza.” Ajo shtoi gjithashtu: “Mendoj se është qesharake që ju (sic) jeni një model, sepse në realitet kjo është kundër besimit mysliman dhe nëse do të punonit si model në ndonjë vend mysliman, do të qëlloheshit me gurë.”
Sipas profilit të saj zyrtar në LinkedIn, Perilman është një veterane e industrisë, pasi ka punuar për marka si Forever 21 dhe Calvin Klein. Sipas faqes së saj zyrtare në LinkedIn, Vanessa Ivy Perilman punon si “Dizenjuesja kryesore për koleksionin e grave në Zara“, një pozicion që ajo e ka mbajtur për 8 vjet, pasi ka marrë rolin në 2015.
Kompania mëmë e Zara, Inditex, madje lëshoi një deklaratë duke pretenduar se nuk pranonte asnjë lloj “mungese respekti“ për asnjë besim, kulturë, fe, racë apo vend. “Ne i dënojmë këto komente që nuk pasqyrojnë vlerat tona thelbësore të respektit për njëri-tjetrin dhe na vjen keq për ofendimin që ata kanë shkaktuar.”
Tashmë Perliman ka mbyllur rrjetet sociale pasi tregoi se po kërcënohej nga persona të ndryshëm.
