Kozmonauti veteran rus Oleg Kononenko është rikthyer në Tokë pas një qëndrimi rekord në Stacionin Ndërkombëtar të Hapësirës (ISS). Kozmonauti 60-vjeçar ka kaluar tani 1,111 ditë jo të njëpasnjëshme në orbitë, që është më e gjatë se çdo astronaut tjetër në histori – dhe ka të ngjarë të mbetet i pamposhtur për shumë vite.
Kononenko, i cili mbushi 60 vjeç në qershor, u kthye në Tokë brenda anijes kozmike të Rusisë Soyuz MS-25 më 23 shtator, së bashku me kozmonautët e tjerë Nikolai Chub dhe astronautin e NASA-s, Tracy Caldwell Dyson. Ata u ulën në stepën e Kazakistanit rreth 3.5 orë pasi u shkëputën nga ISS. Dy kozmonautët, ose astronautët rusë, kishin kaluar një rekord prej 374 ditë të vazhdueshme në bordin e stacionit hapësinor, duke thyer rekordin e astronautit të NASA-s Frank Rubio i cili pa dashje përfundoi një qëndrim 371-ditor në ISS vitin e kaluar pasi anija e tij kozmike u dëmtua. Dyson, ndërkohë, u kthye pasi kaloi 184 ditë në hapësirë.
Kononeko theu për herë të parë rekordin për më shumë ditë kumulative në hapësirë në shkurt, kur ai tejkaloi qëndrimin 878-ditor të bashkatdhetarit Gennady Padalka, i cili vendosi rekordin në vitin 2015. Kononeko ka fluturuar në pesë misione të ndryshme në ISS që nga viti 2008, duke grumbulluar këtë total mbresëlënës.
“Faleminderit të gjithë shokëve të ekuipazhit për miqësinë tuaj. Ka qenë një kohë dhe kënaqësi e madhe të punojmë dhe të kalojmë kohë së bashku këtu si një familje e madhe në bordin e Stacionit Ndërkombëtar të Hapësirës,” tha Kononenko teksa po largohej nga ISS. “Për momentin po largohem nga shtëpia ime e dytë”.
Për t’i vënë këto shifra në perspektivë, Kononeko është përgjegjës i vetëm për rreth 1.5% të kohës totale të kaluar në hapësirë nga më shumë se 600 njerëz, që kur fluturimi i parë njerëzor në hapësirë u krye nga bashkatdhetari i Kononekos, Yuri Gagarin në 1961.
