Një grua 101-vjeçare është ngatërruar disa herë nga linjat ajrore si një fëmijë 1 vjeç për shkak të një problemi me sistemin e rezervimeve të linjave ajrore.
Problemi ndodh sepse sistemet e American Airlines me sa duket nuk mund të llogarisin që Patricia ka lindur në vitin 1922 dhe jo në 2022.
“Ishte qesharake që ata mendonin se isha vetëm një fëmijë i vogël dhe unë jam një zonjë e moshuar!” tregoi Patricia në një intervistë për BBC. Por 101 vjeçarja thotë se do të dëshironte që ky problem të rregullohej sa më shpejt pasi i ka shkaktuar disa probleme dhe në të kaluarën. Për shembull, në një rast, stafi i aeroportit nuk kishte përgatitur transportin për të brenda terminalit, pasi ata prisnin një fëmijë që do të mbahej në krahë nga nëna.
Patricia po fluturonte me vajzën e saj, Kris. “Vajza ime bëri rezervimin online për biletën dhe kompjuteri në aeroport mendoi se data ime e lindjes ishte 2022 dhe jo 1922,” tregoi ajo. “E njëjta gjë ndodhi edhe vitin e kaluar dhe ata prisnin që në vendin tim të shfaqej një foshnje dhe jo un”.
Vendi i Patricias ishte rezervuar si një biletë për të rritur. Por duket se sistemi kompjuterik i aeroportit nuk është në gjendje të përpunojë një datë lindjeje kaq të hershme – kështu që me sa duket ka vendosur një limit kohor prej 100 vitesh. Ish-infermierja, e cila fluturon çdo vit për të parë familjen dhe për t’i shpëtuar dimrave të ftohtë, thotë se në të dyja rastet stafi i American Airlines ishte i sjellshëm dhe i dobishëm, pavarësisht nga konfuzioni.
Në një fluturim të mëparshëm, Patricia dhe vajza e saj po prisnin brenda aeroplanit pasi pasagjerët e tjerë ishin larguar, pasi stafi i aeroportit nuk i kishte përgatitur një karrige me rrota. Ajo thotë se njohja e moshës së saj reale do të ishte gjithashtu e dobishme për Kris. “Unë do të doja që ata të rregullonin kompjuterin pasi vajza ime duhej të mbante të gjitha bagazhet dhe veshjet tona pothuajse një kilometër nga një portë në tjetrën,” tha ajo.
