Miliarderët si Jeff Bezos tashmë përshkojnë ujërat e botës në superjahtet e tyre. Mirëpo tashmë ata mund të blejnë dhe një nëndetëse po aq luksoze për të shijuar bukurinë e thellësisë së këtyre ujërave.
Një firmë austriake e projektimit ka projektuar supernëndetësen e parë në botë, e përshkruar si ‘e ardhmja e jahteve’. Me një gjatësi prej 165 metrash, ‘Migaloo M5’ mund të mbajë 20 pasagjerë dhe 40 anëtarë të ekuipazhit ndërsa është zhytur vazhdimisht nën ujë për katër javë. Ajo vjen e pajisur me një pishinë, kantinë vere dhe kinema, por ka një kosto prej $2 miliardë për t’u ndërtuar, pra është e rezervuar thjesht për elitën botërore.
Kjo nëndetëse ambicioze – e cila mund të zhytet në një thellësi deri në 250 metra – është projektuar nga firma e projektimit Migaloo, me qendër në Graz, Austri. “Grupi ynë i synuar janë miliarderë vizionarë me ose pa përvojë ekzistuese në superjahte, të cilët kanë kërkesa të jashtëzakonshme për ekskluzivitetin, sigurinë, aventurën ose përvoja të reja”, tha CEO Christian Gumpold për Times.
“Meqenëse është një zhvillim krejtësisht i ri, një projekt i tillë do të kërkojë burime monetare përkatëse, do të marrë shumë kohë për projektimin, ndërtimin dhe do të kërkojë marrjen e shumë vendimeve.“
Kjo nëndetëse mund të qëndrojë mjaft mirë edhe pa u zhytur. Pishinat në të dyja anët e saj shtrihen mbi ujë ndërkohë që nëndetësja është ende në sipërfaqe. Këto pishina mund të futen përsëri në trupin e nëndetëses përpara se ajo të zhytet. Ekziston edhe një platformëpër pritjen e mysafirëve me helikopterin e tyre privat përpara se nëndetësja të nisë udhëtimin.
Ndërkohë, pjesa e brendshme luksoze është kryesisht e veshur me ar dhe lëkurë të bardhë dhe vjen e kompletuar me divane komode dhe shezllone.
Gjithashtu, personat e pranishëm mund të admirojnë thellësitë e oqeanit përmes një dritareje shikimi në fund të nëndetëses.
