Medaljet e fituara në Lojërat Olimpike kanë një vlerë të jashtëzakonshme simbolike për çdo sportist, por gjithashtu shoqërohet me shpërblime financiare që ndryshojnë nga një vend në tjetrin. Shpërblimet financiare ndryshojnë në varësi të shtetit që sportistët përfaqësojnë dhe medaljes së fituar.
Shqipëria, për shembull, nuk e ka dhënë ende bonusin financiar të parashikuar në rast të fitimit të medaljeve në Lojërat Olimpike, pasi një gjë e tillë nuk ka ndodhur ende. Megjithatë, Geek Room i uron shumë suksese 8 sportistëve që na përfaqësojnë në këtë event sportiv madhor për të arritur një sukses gjatë lojërave të “Paris 2024”.
Sa mund të paguhen sportistët shqiptarë pas suksesit në këtë kompeticion?
Legjislacioni në Shqipëri parashikon shpërblimin për fituesit e medaljes së artë në Lojërat Olimpike me 10 milion lekë të rinj. Medalistët e argjendtë shpërblehen me 7 milionë lekë, ndërsa ata të bronztë me 5 milionë lekë. Gjithashtu, për vendosjen e një rekordi olimpik ofrohen 15 milionë lekë.
Notarja 16 vjeçare Kaltra Meça ndërkohë u rendit e katërta në provën e saj në disiplinën e notit 200 metra stil i lirë me kohën 2:12.21. Një performancë për t’u duartrokitur dhe pse nuk arriti dot të kualifikohej më tej.
Shpërblimet do të shpërndahen dhe për sportistët që arrijnë deri në vendin e 8, ku mund të marrin:
- 3 milionë lekë për vendin e 4-t
- 2 milionë për vendin e 5-të
- 1 milionë për vendin e 6-të
- 800,000 lekë për vendin e 7
- 400,000 lekë për vendin e 8
Po për përfaqësuesit e shteteve të tjera, sa është shpërblimi?
Komiteti Olimpik Italian (CONI) ofron 180 mijë euro për medalistët e artë, 90 mijë për medaljet e argjendta dhe 45 mijë për medaljet e bronzit. Ndërkohë, në Shtetet e Bashkuara të Amerikës shpërblimet janë më modeste: 35 mijë euro për medaljen e artë, 21 mijë euro për argjendin dhe 14 mijë euro për bronzin.
Arabia Saudite ofron shpërblime shumë më të mëdha, kujtojmë këtu fituesin e medaljes së argjendtë Hamedi në “Tokio 2020” që u shpërblye me 1.2 milionë euro. Në Hong Kong, sportistët marrin rreth 700 mijë euro për një medalje ari, falë mbështetjes nga sponsorët lokalë.
Përveç shpërblimeve në para, në disa vende fituesit e medaljeve mbështeten me lopë, shtëpi të reja ose restorante. Në Kazakistan dheKinë, sportistët shpërblehen me apartamente sipas ngjyrës së medaljes.
Ndërkohë, në Britaninë e Madhe, Suedi dhe Norvegji, nuk ka shpërblime monetare direkte, por ofrohet mbështetje dhe financim për përgatitjen dhe zhvillimin e sportistëve.
