“Ligji i Zipf”, i formuluar nga studiuesi amerikan George Kingsley Zipf në vitet 1930, thotë se sa më shpesh të përdoret një fjalë, aq më tepër priret të shkurtohet, dhe anasjelltas. Fjalët e zakonshme janë të shkurtra, ndërsa ato që përdoren rrallë herë janë të gjata. Kur fjalët e gjata përdoren shpesh, ato zakonisht shkurtohen (si p.sh.: televizion → TV). Ky ligj gjendet në shumë gjuhë të botës pa përjashtim.
Një studim i ri nga Universiteti i Manchester-it dhe Chester Zoo i publikuar në PLOS Computational Biology ka zbuluar se edhe zogjtë ndjekin këtë rregull: tingujt dhe thirrjet e përdorura më shpesh janë më të shkurtra. Studiuesit përdorën mjetin e ri ZLAvian, i cili analizon këngët e zogjve duke lidhur gjatësinë e notave me shpeshtësinë e përdorimit. U analizuan mbi 600 këngë nga 11 popullata të shtatë specieve të ndryshme. Edhe pse popullatat individuale nuk tregonin gjithmonë një model të qartë, kombinimi i të dhënave zbuloi një lidhje të fortë: këngët më të përdorura ishin dukshëm më të shkurtra.
Studimi thekson se analiza e këngëve të zogjve është më komplekse sesa te gjuha njerëzore, pasi zogjtë kanë pak tipe notash dhe repertorë që ndryshojnë shumë mes individëve. Megjithatë, ky model është vërejtur edhe tek kafshë të tjera, si balenat gungore dhe pinguinët.
Ligji i Zipf-it tregon se komunikimi optimizohet për efikasitet, i lidhur me “parimin e përpjekjes minimale”: sistemet priren të zgjedhin rrugën që kërkon më pak energji. Prania e tij tek kafshët tregon se nuk është një zgjedhje e vetëdijshme apo thjesht kulturë njerëzore, por një rregull themelor që formëson shumë sisteme.
Për më tepër, Zipf gjeti një tjetër model matematikor ku fjalët më të përdorura shfaqen me frekuenca të parashikueshme, duke zbuluar një rend të qëndrueshëm në gjuhë.
