Edicioni i dytë i “Junction X Tirana”, një ngjarje kyçe për inovacionin në fushën e teknologjisë, pritet të mbahet nga 31 maji deri më 2 qershor 2024 në Pallatin e Kongreseve. Pas suksesit të jashtëzakonshëm të vitit të kaluar, ku 145 pjesëmarrës nga 500 aplikantë u përzgjodhën për të krijuar 36 projekte inovative, eventi synon të zgjerojë akoma më shumë horizontet e tij.
Vitin e kaluar, një ekip i përzgjedhur u dërgua në Finlandë me “Golden Ticket” për të përfaqësuar Shqipërinë për herë të parë në një garë ndërkombëtare me mbi 3000 pjesëmarrës, duke arritur një vend në Top 3 në nivel global. Kjo përfaqësi jo vetëm që rriti profilin e Shqipërisë në arenën e teknologjisë, por edhe solli njohuri dhe përvoja të çmuara për pjesëmarrësit.
Këtë vit, “Junction X Tirana” pritet të tërheqë pjesëmarrës edhe nga vende të tjera si Polonia, Anglia, Italia dhe Algjeria, duke e bërë këtë event një vendtakim ndërkombëtar të talentëve në fushën e teknologjisë. Pjesëmarrësit do të kenë mundësinë të punojnë së bashku me kompanitë partnere dhe të zhvillojnë zgjidhje që mund të transformojnë industri të tëra.
Çfarë përfaqëson Junction Hackathon?
Në shtatë vitet e fundit, Junction ka ndërtuar një komunitet prej mbi 20,000 talentësh në fushën e teknologjisë, duke u shërbyer si urë lidhese mes inovacionit dhe partnerëve të rinj. Eventi është një platformë e rëndësishme për të zbuluar dhe stimuluar talentet e reja, si dhe për të krijuar lidhje me kompanitë më të mëdha globale si Google, Facebook dhe Apple.
Përfitimet për pjesëmarrësit:
– Çmimi i madh prej 3000 euro.
– Golden Ticket, që përfshin udhëtimin, akomodimin dhe pjesëmarrjen në Junction Hackathon Global në Helsinki, ku janë të pranishme kompanitë më të mëdha në botë.
– Mundësi për të ndarë dhe mësuar trendet më të fundit në teknologji nga një komunitet aktiv ndërkombëtar.
– Certifikata pjesëmarrjeje që njihet si praktikë pune në BE.
Zgjedhja e Grupit fitues:
Fituesit do të zgjidhen me vota nga vetë pjesëmarrësit, duke vlerësuar produktin më të mirë nëpërmjet një aplikacioni të krijuar posaçërisht për këtë garë. Kompanitë partnere mund të ofrojnë gjithashtu çmime stimuluese për grupet që do të zhvillojnë sfidën më të mirë.
Junction X Tirana synon të përfaqësojë në mënyrë dinjitoze Shqipërinë në rrjetin global të hackathons dhe të ekspozojë gjeneratën e re të teknologëve në një skenë ndërkombëtare, ndërsa krijojnë një komunitet hackathon për Ballkanin dhe më gjerë dhe lidhin kompanitë me përfaqësues nga Junction Hackathon Finlandë dhe kompanitë e huaja pjesëmarrëse.
Me një orar të ngjeshur 48-orësh dhe të tre vaktet e përfshira, Junction X Tirana premton të jetë një aventurë që çdo entuziast i teknologjisë nuk duhet ta humbasë. Aplikoni tani për të qenë pjesë e ndryshimit!
