Biseda e Elon Musk me ish-presidentin Donald Trump nisi me vështirësi. Intervista, e cila u organizua në X Spaces filloi 42 minuta më vonë se ishte planifikuar. Ata që arritën të futeshin në Space, thanë se ajo filloi me muzikë lo-fi techno të luajtur nga llogaria e Trump për rreth 30 minuta. Versionin e regjistruar mund ta dëgjoni këtu.
18 minuta pasi biseda duhej të fillonte, Musk pohoi se X pësoi një sulm masiv DDOS që e kishte bërë të pamundur që biseda të vazhdonte siç ishte planifikuar, megjithatë kjo gjë nuk është e konfirmuar.
Në një seri postimesh pasuese në X, Musk pretendoi se kompania testoi sistemin me 8 milionë dëgjues njëkohësisht të hënën. Rreth kohës kur filloi intervista, X tha se kishte 915,000 njerëz që dëgjonin njëkohësisht këtë Space.
Më vonë, pasi lidhja u stabilizua, Trump nisi të fliste për “ëndrrën amerikane”, të cilën premton ta ringjallë. “Unë dua që kompanitë të ndërtojnë këtu dhe njerëzit do të shkojnë në punët që duan,” tha Donald Trump.
Më tej ai përmendi se SHBA kishte armiq më të mëdhenj se Koreja e Veriut apo Rusia. Duke folur se si “armët bërthamore janë kërcënimi më i madh për momentin”, Trump theksoi miqësinë e tij me presidentin rus, Vladimir Putin. Duke folur për kundërshtaren e tij Kamala Harris, Donald Trump tha se Kamala Harris ishte “fake“. Ai madje e quajti atë “të paaftë” pasi nuk ishte në gjendje të trajtojë çështjen e emigrantëve të paligjshëm që kalojnë kufijtë e SHBA.
Donald Trump kishte detajuar gjithashtu se si Thomas Matthew Crooks kishte tentuar ta vriste atë, në fushatën e tij në Pensilvani një muaj më parë. Trump tha shpëtimi i tij “ishte një mrekulli”, dhe se ai kishte lëvizur kokën pikërisht në momentin e duhur kur plumbi i kaloi pranë veshit.
