Ditën e enjte u publikua një video në Reddit e cila tregon se si një makinë Tesla përplaset në mënyrë të ngadaltë me një avion privat $3.5 milionësh pasi përdoruesi i saj aktivizoi “Smart Summon”, një shërbim që e bën makinën të dalë nga parkimi dhe të shkojë drejt pronarit të saj.
Në postim tregohet se ky incident ndodhi gjatë një eventi të sponsorizuar nga Cirrus në Washington.
Shërbimi “Smart Summon” mund të aktivizohet nga aplikacioni i Tesla për smartphone dhe mund të funksionojë në një distancë maksimale prej 60 metrash midis makinës dhe pronarit, për sa kohë ju mund të shikoni makinën tuaj.
Sigurisht komentuesit nën këtë postim ishin të shumtë, dhe pjesa më e madhe e tyre nuk arrinin të kuptonin se si një përdorues mund të jetë kaq i pakujdesshëm sa të aktivizojë drejtimin autonom ndërkohë që rrethohet nga avionë privatë shumë të shtrenjtë.
Për herë të parë “Smart Summon” u lançua në vitin 2019, dhe që nga ajo kohë në internet kanë qarkulluar video të ndryshme ku tregohet se si makina shpëton mjaft mirë nga disa raste aksidenti, apo dëmton pjesë të ndryshme të saj ndërkohë që del nga parkimi.
Megjithatë kjo gjë nuk e ka penguar Elon Musk ta quajë “Smart Summon” shërbimin më viral që kompania e tij ka krijuar.
