Shumica e automjeteve në rrugë përdorin një kombinim të dritave me tre ngjyra: të bardha për fenerët dhe dritat e pasme, të kuqe për dritat e pasme dhe të frenave dhe portokalli për sinjalizuesit. Ngjyra të tjera, si bluja e errët, janë të rezervuara për përdorim policor.
Tani, Mercedes-Benz do të sjellë ngjyrën bruz në autostradat në Kaliforni dhe Nevada. Në Kaliforni, kompania Mercedes-Benz ka marrë lejen për të provuar funksionimin e këtyre dritave në automjetet testuese për dy vjet. Në Nevada, prodhuesi i automjeteve mund të fillojë të aktivizojë funksionin në automjetet e prodhuara në vitin 2026.
Dritat bruz do të ndizen kur të jetë aktivizuar Drive Pilot. Mercedes-Benz Drive Pilot është një sistem i avancuar i asistencës në drejtimin e nivelit 3 (ADAS) që mund të përdoret vetëm në situata të kufizuara dhe në zona të caktuara, si në trafikun e rënduar në autostrada të zgjedhura me shpejtësi 65km/h ose më pak. Drive Pilot është gjithashtu i kufizuar të përdoret gjatë ditës dhe gjatë motit të kthjellët dhe nuk mund të përdoret në zona ndërtimi. Për më tepër, shoferi nuk lejohet të bie në gjumë ose të largohet nga sedilja e shoferit.
Si një sistem i Nivelit 3, shoferi lejohet të heqë duart nga timoni, këmbët nga pedalet dhe të largojë vëmendjen nga rruga. Me Drive Pilot të aktivizuar, përdoruesit janë të lirë të shfletojnë internetin ose të shikojnë video në ekranin qendror të automjetit.
Shenjat me ngjyrë bruz do të paralajmërojnë drejtuesit e tjerë për faktin se automjeti juaj është duke u drejtuar automatikisht, kështu që shpresojmë se ata nuk do të alarmohen nëse ju shohin duke bërë gjëra të tjera ndërsa jeni pas timonit. Mercedes-Benz tha se studime të shumta kanë vërtetuar se bruz është ngjyra optimale për drejtimin e automatizuar, pasi “si faktorët fiziologjikë ashtu edhe ata psikologjikë dëshmojnë vlera më të larta në pothuajse të gjitha zonat me ngjyrën bruz sesa me ngjyra të tjera“.
