Udhëtimet e gjata rrugore do të bëhen më të lehta dhe më argëtuese për pasagjerët falë teknologjisë së re të Sony Honda Mobility. Kompania, një sipërmarrje e përbashkët mes dy gjigantëve japonezë Sony dhe Honda, ka njoftuar se automjeti i saj elektrik Afeela do të mbështesë PS Remote Play, duke sjellë përvojën e lojërave PlayStation brenda makinës.
Kjo do të thotë se përdoruesit do të jenë në gjendje të luajnë lojëra nga PS5 ose PS4 përmes ekranit të integruar të sistemit infotainment të Afeela. Edhe pse lojërat në makinë mund të duken si një veçori për një grup të caktuar përdoruesish, ajo ofron një mënyrë të re për të kaluar kohën, pasi drejtuesit mund të luajnë kur makina është e parkuar, ndërsa pasagjerët mund të vazhdojnë aventurat e tyre në RPG apo lojëra të tjera gjatë udhëtimeve të gjata.
Një nga avantazhet kryesore është fleksibiliteti, pasi përdoruesit mund të marrin me vete kontrollerin DualSense nga shtëpia dhe të vazhdojnë lojën pikërisht aty ku e kanë lënë, sapo të hipin në Afeela. Për funksionimin e PS Remote Play kërkohet një lidhje interneti broadband prej të paktën 5 Mbps, ndërsa një shpejtësi 15 Mbps ofron një përvojë më të qëndrueshme dhe më të rrjedhshme.
Kjo nuk është hera e parë që Sony Honda Mobility prezanton këtë ide. Afeela 1, modeli që pritet të nisë dërgesat e para në vitin 2026, u demonstrua me aftësinë për të luajtur lojëra PlayStation gjatë CES 2024. Në një kontekst më të gjerë, lojërat në automjete elektrike nuk janë risi e plotë, Tesla kishte integruar më herët mbështetjen për Steam në modelet Model S dhe X, por më vonë e hoqi këtë funksion.
