Të dhënat e reja nga S&P Global Mobility tregojnë se burrat janë 2 herë më të prirur se gratë të zotërojnë automjete elektrike në SHBA. Edhe pse burrat kanë një epërsi të vogël në zotërimin e makinave në përgjithësi, hendeku gjinor për automjetet elektrike është dyfish më i madh sesa për makinat me benzinë apo hibride. Ekspertët theksojnë se për të ruajtur ritmin e rritjes së shitjeve, kompanitë duhet të tërheqin më shumë gra drejt kësaj teknologjie, e cila është më e përballueshme dhe më e favorshme për mjedisin.
Paradoksalisht, gratë shprehen më të shqetësuara për ndryshimet klimatike, por prirja për të blerë makina elektrike është më e ulët tek ato. Arsyeja kryesore lidhet me koston më të lartë fillestare të EV dhe faktin që burrat kanë më tepër të ardhura , si dhe janë më të gatshëm të rrezikojnë me teknologji të reja. Analistët e industrisë vërejnë gjithashtu se gratë priren drejt blerjeve më pragmatike, ndërsa makinat elektrike ende perceptohen si një investim i pasigurt.
Në dekadën e kaluar, kultura “teknologjike mashkullore” që u formua rreth markave si Tesla kontribuoi në këtë pabarazi. Fushatat e hershme të marketingut për EV-të shpesh e portretizuan drejtuesin mashkull si figurën kryesore, duke e bërë këtë segment më pak tërheqës për gratë.
Megjithatë, situata po përmirësohet. Raporti mes burrave dhe grave në pronësinë e EV-ve ka kaluar nga 3 me 1 në 2 me 1. Kompanitë e karikimit po përmirësojnë infrastrukturën me ndriçim dhe siguri më të mirë, ndërsa komunitetet online të grave si “Mustang Mach-E Girls Club” dhe fushata “I’ll Drive What She’s Driving” po ndihmojnë në promovimin e EV-ve tek gratë. Synimi është të thyhet perceptimi se makinat elektrike janë vetëm për burra dhe të tregohet se ato janë një zgjedhje e zgjuar dhe e përshtatshme për të gjithë.
