Jemi vetëm disa ditë larg fillimit të sezonit të ri të F1, dhe të gjithë fansat mezi po presin të shikojnë pilotët e tyre të preferuar duke garuar në pistën e Bahreinit në datën 2 mars, ndërkohë që periudha testuese prej 3 ditësh ka nisur. Ka disa ndryshime që do ta bëjnë këtë kampionat akoma dhe më interesant se kampionatet e kaluara, për të cilat do të flasim pak më poshtë.
- Stabilitet maksimal për sa i përket pilotëve
Sezoni i ri i Formula 1 do të përfshijë të njejtët pilotë të cilët ishin të pranishëm dhe në vitin paraardhës, duke bërë kështu që të konfirmohet niveli i stabilitetit në këtë kategori (pavarësisht ndryshimit të ekipeve të disa pilotëve).
2. F1 2024 do të jetë më i gjati në histori
Ky sezon do të jetë më i gjati i organizuar ndonjëherë në F1, pasi do të zhvillohen gjithsej 24 gara në 21 shtete të ndryshme. Gjithçka do të nisë pas pak ditësh, me garën në Bahrein.
3. Vendndodhje të reja për garat e sprintit
Janë planifikuar që të organizohen 6 gara sprinti me vendndodhje të reja në Kinë, Miami, Austri, SHBA, Brazil dhe Katar. Ky format me 6 gara sprinti nuk është finalizuar ende, dhe diskutimet po vazhdojnë për të adresuar shqetësimet e ngritura nga ekipet pjesëmarrëse rreth formatit të vjetër.
4. Emra të rinj për ekipet
AlphaTauri do të përdorë tashmë një emërtim të ri, Visa Cash App RB, ndërkohë që ekipi i Alfa Romeo do të njihet tashmë si Stake F1 Team deri kur Audi të përfshihet në F1 në vitin 2026. AlphaTauri dhe Haas do të kenë tashmë drejtues të rinj ekipesh, respektivisht Laurent Mekies dhe Ayao Komatsu.
5. Siguria e pilotëve vazhdon të mbetet aspekt kryesor
Rregullat teknike do të mbeten të fokusuara në shëndetin dhe mirëqenien e pilotëve, dhe tashmë do të prezantohen dhe “cooling scoops”, një modifikim i ri që do të lejojë freskimin e pilotëve të cilët drejtojnë makinën në temperatura mjaft të larta.
6. Lewis Hamilton tashmë është pjesë e Ferrarit
Lajmi se Lewis Hamilton do t’i bashkohet Ferrarit këtë sezon bëri bujë të madhe në media, ndërkohë që fansat mezi po presin ta shikojnë atë duke drejtuar supermakinën e kuqe. Ndërkohë në ekipin e Red Bull, drejtuesi Christian Horner po përballet me disa akuza për sjellje të papërshtatshme.
Padyshim që na pret një sezon mjaft emocionues këtë vit, dhe mbetet për t’u parë nëse lëvizja e Lewis Hamilton drejt Ferrari do të rezultojë e suksesshme për të rrëzuar nga froni Max Verstappen, i cili ka qenë piloti më i mirë prej 3 vitesh në F1.
Mbetet për t’u parë gjithashtu nëse stafi i Ferrari do të regjistrojë kohë të shpejta në pit stop, sigurisht nëse Hamilton nuk ngatërron pozicionin e skuadrës së tij në bokse.
