WhatsApp ka arritur një marrëveshje me Bashkimin Evropian pas ndryshimit të politikave të privatësisë në platformë gjatë vitit 2021. Pas diskutimeve me Komisionin Evropian dhe rregullatorët për mbrojtjen e klientëve në BE, WhatsApp ka vendosur ta bëjë më të thjeshtë për përdoruesit që të refuzojnë përmirësimet e propozuara në kushtet e shërbimit.
Kjo platformë zotohet gjithashtu që të “shpjegojë qartësisht” se refuzimi i përmirësimeve në kushtet e shërbimit do të çojë në limitimin e funksioneve brenda platformës. WhatsApp ka konfirmuar se nuk shpërndan asnjë nga të dhënat personale të përdoruesve me produktet e tjera të Meta, si përshembull Facebook, apo produkte të tjera të palëve të treta për qëllime reklamimi.
WhatsApp irritoi shumë përdorues në fillim të vitit 2021 ku i kërkoi atyre që të shpërndajnë të dhënat e ndërlidhjes apo transaksioneve të ndryshme me kompanitë e tjera nën menaxhimin e Meta. Dhe pse shumë pak gjëra do të ndryshonin për përdoruesit, ky ndryshim u keqinterpretua nga përdorues të ndryshëm të cilët menduan se WhatsApp do të shpërndante të dhënat e grumbulluara nga mesazhet dhe telefonatat me Facebook.
Ndryshimet në kushtet e shërbimit shkaktuan një eksod të madh të përdoruesve drejt platformave të tjera rivale si Telegram apo Signal, të cilët nxituan të përfitonin nga ky moment dobësie duke përmirësuar shërbimet në platformën e tyre.
Komisioni Evropian kërkoi nga WhatsApp që njoftimet e rradhës të jenë të shpjeguara qartësisht në lidhje me mënyrën e përdorimit të të dhënave të përdoruesve.
