Në të njëjtën ditë kur Meta njoftoi se do të përdorë bisedat me inteligjencën artificiale për të personalizuar reklamat, kreu i Instagram, Adam Mosseri, publikoi një video për të sqaruar një prej thashethemeve më të vjetra ndaj kompanisë: “Betohem, nuk ju përgjojmë përmes mikrofonit,” tha ai.
Për vite me radhë, shumë përdorues kanë besuar se saktësia e reklamave në Facebook dhe Instagram tregon se Meta i përgjon bisedat e tyre. Kompania ka mohuar këtë që prej vitit 2016, duke deklaruar se nuk përdor mikrofonin e telefonit për reklama apo për përmbajtjen e News Feed. Edhe në 2018, gjatë një seance në Senatin amerikan, Mark Zuckerberg e mohoi kategorikisht këtë praktikë. Në dokumentet zyrtare të mbështetjes, Meta përsërit se përdor mikrofonin vetëm me lejen e përdoruesit dhe vetëm kur funksioni e kërkon, si në video apo audio call.
Në videon e fundit, Mosseri theksoi: “Nuk ju dëgjojmë. Nuk përdorim mikrofonin e telefonit për të përgjuar.” Ai shtoi se një praktikë e tillë do të ishte “shkelje e rëndë e privatësisë” dhe do të konsumonte shumë bateri.
Për të shpjeguar pse përdoruesit shpesh shohin reklama për produkte për të cilat sapo kanë folur, Mosseri dha disa arsye të mundshme: përdoruesi mund të ketë kërkuar ose klikuar më parë diçka të ngjashme; Meta bashkëpunon me reklamues që ndajnë të dhëna për vizitorët e faqeve të tyre; algoritmet e reklamave bazohen te interesat e miqve ose njerëzve me profile të ngjashme; ose thjesht, rastësi.
Megjithatë, Mosseri pranoi se skepticizmi do të vazhdojë. Një prej komenteve më të pëlqyera nën videon e tij ironizonte: “Kjo është saktësisht ajo që do të thosha nëse do të përgjoja bisedat e njerëzve.”
