Pas gati një dekade shërbim si një kapsulë dixhitale kohe për kujtimet personale të përdoruesve, Snapchat ka vendosur kufizime mbi shërbimin e tij Memories. Kompania ka njoftuar se qasja falas do të kufizohet në 5GB, dhe kushdo që e kalon këtë hapësirë do të duhet të zgjedhë një plan abonimi për të ruajtur të gjitha kujtimet.
Sipas detajeve të publikuara, plani bazë ofron deri në 100GB për $1.99 në muaj. Përdoruesit e Snapchat+ do të marrin deri në 250GB si pjesë e abonimit të tyre prej $3.99, ndërsa opsioni më i avancuar, Snapchat Platinum, u jep përdoruesve deri në 5TB hapësirë për $15.99 në muaj.
Kompania thekson se në momentin e lançimit nuk kishte parashikuar rritjen e madhe të Memories. Sot, përdoruesit kanë ruajtur më shumë se 1 trilion Snaps, duke e bërë të domosdoshme investimin në infrastrukturë shtesë. “E dimë që nuk është e lehtë të kalosh nga një shërbim falas në një me pagesë, por shpresojmë që vlera e Memories ta justifikojë këtë hap,” shkroi Snapchat në blogun e tij.
Për të lehtësuar tranzicionin, kompania do të ofrojë 12 muaj ruajtje të përkohshme për çdo përdorues që kalon limitin e 5GB, duke u dhënë kohë të shkarkojnë fotot në pajisje ose të abonohen. Nëse një përdorues nuk zgjedh plan pagese, aplikacioni do të mbajë kujtimet më të vjetra, ndërsa ato më të rejat që tejkalojnë kufirin do të fshihen.
Sipas Snapchat, shumica dërrmuese e përdoruesve nuk do të preken, pasi ata ruajnë më pak se 5GB. Ndryshimi synon kryesisht ata me “mijëra Snaps”, duke u dhënë mundësi kompanisë të mbulojë kostot e larta të ruajtjes së të dhënave dhe njëkohësisht të monetizojë përdoruesit më aktivë.
