WhatsApp do të shtojë mundësinë e transferimit të historisë së chat-it tuaj nga smartphone-t Android në iPhone, pasi më parë kishin bërë të mundur tranferimin e chats anasjelltas (nga iPhone në Android). Prezenca e shërbimit të ri u lajmërua nga vetë CEO i Meta, Mark Zuckerberg përmes një postimi në Facebook.
Ky update do të ndihmojë në problemin “historik” të WhatsApp, i cili vështirësonte transferimin e bisedave midis dy sistemeve operative të ndryshme, ndërkohë që transferimi i tyre brenda një sistemi operativ të caktuar nuk përbënte problem.
Shenjat e para të këtij shërbimi u zbuluan për herë të parë nga WABetaInfo. Proçesi i transferimit funksionon vetëm në një pajisje të re iPhone ose të bërë factory reset, dhe shfrytëzon aplikacionin ekzistues Move to iOS të Apple për Android (i cili ju ndihmon gjithashtu të transferoni kontaktet, kalendaret, mesazhet dhe shumë gjëra të tjera).
Gjatë konfigurimit të iPhone-it tuaj, zgjidhni opsionin “Move data from Android”, dhe ndiqni hapat në pajisjen Android. Pasi iPhone të jetë konfiguruar në mënyrë të suksesshme, hapni WhatsApp dhe regjistrohuni në numrin tuaj. Historia e bisedave të ruajtura nga Android duhet të shfaqet menjëherë.
Për të nisur këtë transferim, duhet që të keni një pajisje me version Android më të ri se 5.0 dhe iOS 15.5 në iPhone. Për fat të keq, nëse ju keni një histori bisedash të mëparshme në iPhone-in tuaj, transferimi i historisë nga Android do të mbivendoset.
