TikTok ka nisur t’i ofrojë përdoruesve që të nisin gjithçka nga e para në rast se janë mërzitur me postimet që i shfaqen gjithnjë e më tepër në feed-in e tyre. Shërbimi i ri do të fshijë të gjithë ndërveprimet tuaja të mëparshme në aplikacion dhe do të nisë të rekomandojë video të reja.
“Kur ky shërbim aktivizohet, lejon dikë që të shikojë përmbajtje në TikTok sikur sapo të jetë regjistruar në platformë.” tregohet në postimin në blog të kompanisë.
Shërbimi mund të jetë tepër i rëndësishëm për të gjithë njerëzit që mendojnë se postimet e tyre të rekomanduara nuk i përshtaten më interesave të tyre. Për t’i bërë reset feed-it tuaj, mjafton të kërkoni në Settings për shërbimin e ri në content preferences.
TikTok po përballet me hetime të shumta nga SHBA dhe Evropa për shkak të shqetësimeve të ngritura mbi privatësinë e të dhënave të përdoruesve. SHBA mendojnë se platforma shpërndan të gjitha të dhënat e grumbulluara me qeverinë kineze, duke e shndërruar TikTok në një rrezik të madh për sigurinë kombëtare.
Ditën e mërkurë administrata e Biden kërcënoi TikTok se do të dënonte përdorimin e platformës nëse kompania nuk shitej. TikTok nga ana tjetër mohon shpërndarjen e informacioneve me qeverinë kineze dhe ka propozuar një zgjidhje për këtë problem: riorganizimin e biznesit në SHBA.
