Elon Musk po planifikon t’u kërkojë përdoruesve të rinj X të paguajnë një tarifë të vogël për të mundësuar postimin në rrjetin social dhe për të frenuar problemin e robotëve. Duke iu përgjigjur një postimi në X në lidhje me ndryshimet në faqen e internetit të X, Musk tha se ngarkimi i një tarife të vogël për llogaritë e reja ishte “mënyra e vetme” për të ndaluar “sulmin e robotëve“.
“Inteligjenca artificiale aktuale mund ti kalojë me lehtësi pyetjet si ‘are you a bot’.” tha Musk, duke iu referuar shërbimeve si CAPTCHA.
Ndërsa iu përgjigj një përdoruesi tjetër, Musk më vonë shtoi se përdoruesit e rinj do të mund të postonin pas tre muajsh nga krijimi pa paguar një tarifë. Siç ndodh me shumë njoftime në lidhje me platformën sociale, për momentin nuk ka detaje se kur do të zbatohet kjo politikë dhe çfarë tarifash mund të paguajnë përdoruesit e rinj.
Tetorin e kaluar, X filloi të tarifonte përdoruesit e rinj të paverifikuar $1 në vit në Zelandën e Re dhe Filipine. Përdoruesit e rinj pa pagesë që regjistrohen në platformë nga këto rajone mund të lexojnë postimet, por nuk mund të ndërveprojnë me to. Për të postuar përmbajtje, për të pëlqyer, për të ripostuar, për t’u përgjigjur, për të ruajtur postime, ata duhej të paguanin një tarifë.
Musk mund të aplikojë një tarifë të ngjashme me rajonet e tjera. Në fillim të këtij muaji, X tha se platforma po fillonte një spastrim të madh të llogarive të padëshiruara, duke paralajmëruar përdoruesit se numri i ndjekësve të tyre mund të ndikohej. Megjithatë, me një plan për të tarifuar përdoruesit e rinj, kompania e mediave sociale me sa duket synon të trajtojë më mirë problemin e robotëve.