Me sa duket Microsoft po punon prej kohësh për të ofruar disa shërbime të reja që nuk ishin bërë publike deri më tani. Mirëpo në versionin e fundit të Windows 11 janë zbuluar disa referenca që tregojnë për stickers në wallpaper-in e desktopit tuaj, aftësinë për të fshehur taskbar-in dhe seksionin e qëndrueshmërisë në Settings.
Shërbimi i ri i personalizueshëm për të sjellë stickers në wallpaper u shpërnda në Twitter nga Albacore. Screenshot-et e publikuara tregojnë se ju do të jeni në gjendje të zgjidhni disa stickers që përdorni në jetën e përditshme dhe t’i editoni ato në wallpaper-in tuaj. Widgets që gjenden në Windows 11 nuk mund të bëhen pin në desktop, prandaj stickers mund të jenë një alternativë e personalizimit të desktopit.
Albacore ka zbuluar gjithashtu dhe disa referenca të asaj që mund të jetë rikthimi i disa pjesëve të “tablet mode” në Windows 11. Një opsion i ri është shfaqur në taskbar me emërtimin “Automatically hide the taskbar when using your device as a tablet”. Në Windows 11 Microsoft tërhoqi shërbimet e saja më tradicionale që ofroheshin për tablet mode, mirëpo në atë kohë kompania po planifikonte ofrimin e gjesteve të reja për kontrollimin e ekranit në versionin e eliminuar të Windows 10X.
Një tjetër seksion i shfaqur në Settings do të ofrojë rekomandime në mënyrën se si ju mund të kurseni energjinë e pajisjes tuaj.
