Versionet normale të AirTags kanë një speaker të ndërtuar në strukturën e tyre e cila bën zhurmë sa herë është larg pronarit të saj për të treguar për vendndodhjen. Mirëpo në eBay kanë filluar të shiten AirTags të modifikuar, që quhen ndryshe dhe “Silent AirTags”, kushtojnë $77.5, dhe iu është hequr ky speaker. Në këtë mënyrë ato nuk mund të emëtojnë zhurma.
Një shitës në eBay ka treguar se qëllimi i krijimit të Silent AirTag ishte që të mos bënte zhurmë nëse përdorej në një biçikletë apo në makinë, pasi në këtë mënyrë ajo do të reduktonte shancet që hajdutët të kuptonin për praninë e saj. Aktualisht, AirTags fillojnë të emëtojnë një zhurmë midis 8 dhe 24 orëve pasi janë ndarë nga pronari i tyre për të lajmëruar vendndodhjen e tyre.
Edhe pse motivet pas krijimit të një modifikimi të tillë duken “të pafajshme”, shitja e tyre në internet ka alarmuar disa mbështetës të privatësisë. Eva Galperin, drejtuese e sigurisë kibernetike në Electronic Frontier Foundation tregoi për shqetësimin e saj se kjo pajisje e modifikuar mund të përdoret për të përndjekur persona të tjerë.
“Çdo pajisje që ka qëllim kapjen e një hajduti në këtë mënyrë është dhe një mjet perfekt për të përndjekur persona të tjerë. Kjo është arsyeja se pse Apple i reklamon AirTags si mjete për gjetjen e objekteve të humbura dhe jo të vjedhura.” tha Galperin.
