Microsoft po planifikon të lançojë një preview publike të aplikacioneve Android për Windows 11 gjatë muajit të ardhshëm, së bashku me disa përmirësime në taskbar dhe ridizenjime të Notepad dhe Media Player.
Drejtuesi Panos Panay njohu publikun me këto ndryshime në Windows 11 përmes një postimi në blog, dhe me sa duket ky do të jetë update-i i parë madhor i sistemit të ri operativ.
Përmirësimet në taskbar përfshijnë një shërbim mute dhe unmute njësoj si aftësia për të shfaqur orën në monitorët sekondarë. Të dy këto shërbime nuk ishin të pranishme gjatë lançimit të Windows 11, por Microsoft po punon për të përmirësuar taskbar-in dhe për të rikthyer fuksionalitetin “drag and drop”.
Gjatë muajit të ardhshëm një widget për motin do të rikthehet në taskbar, njësoj si në testimet e nisura gjatë këtij muaji. Nga ana tjetër Microsoft ka ridizenjuar aplikacionet Notepad dhe Media Player, të cilat tashmë suportojnë dark mode dhe janë përshtatur për Windows 11.
Shtesa më e rëndësishme gjatë këtij update-i janë aplikacionet Android të përshtatura për Windows 11. Panay thotë se ky version do të jetë një “public preview”, pra shërbimi do të jetë ende në fazë beta dhe kur të publikohet pas një muaji. Tashmë ju do të keni mundësinë të instaloni një numër të limituar aplikacionesh për Android në PC tuaj përmes Amazon App Store.
