Një vajzë adoleshente e cila kishte humbur në SHBA u gjet pasi përdori gjestet e dorës të cilat janë bërë virale në TikTok për të treguar se ajo ishte në rrezik. Ditën e martë në mëngjes prindërit kishin raportuar mospraninë e saj në policinë e Karolinës së Veriut, dhe dy ditë më vonë ajo u gjet në Kentucky.
Një drejtues automjeti telefonoi policinë pasi kishte vënë re “një pasagjere femër në një makinë që po bënte gjeste me duar si një thirrje për ndihmë të cilat janë bërë mjaft virale në rrjetin social Tiktok”. Telefonuesi tregoi se vajza dukej tepër e shqetësuar dhe se po shoqërohej nga një mashkull më i madh në moshë. Policia më vonë arrestoi James Herbert Brick, 61 vjeç ndërkohë që ai po udhëtonte në Kentucky ditën e enjte.
Canadian Woman’s Foundation shpjegon se ky gjest i dorës përdoret nga një person i cili dëshiron të sinjalizojë se ka nevojë për ndihmë. Viktima mban ngritur pëllëmbën e dorës, më pas përkul gishtin e madh para se të vendosë gishtat e tjerë mbi të.
Fushata e quajtur “Sinjalizo për ndihmë” u shpërnda në mënyrë masive në rrjetet sociale gjatë periudhës së izolimit si një zgjidhje e problemit të rritjes së dhunës në familje gjatë kësaj periudhe.
