Amazon do të shtojë një shërbim të ri në asistenten virtuale Alexa, e cila sapo të dëgjojë zhurmën e ndezjes së një konsole nga fëmijët, do t’i tregojë atyre listën e punëve të shtëpisë që duhet të bëjnë.
Kjo lëvizje është pjesë e një serie masash të ndërmarra nga Amazon, të cilët dëshirojnë që Alexa të jetë më tepër pasive, pra të punojë më tepër automatikisht pa ndërhyrjen e njerëzve.
Zëvëndës presidenti i divizionit të Alexa, Tom Taylor tha gjatë Web Summit 2021 se kompania kërkon që Alexa të jetë sa më tepër automatike dhe t’i bëjë njerëzit që t’i drejtohen më pak asaj. Ndër shërbimet e reja që po ecin në këtë drejtim janë dhe “passive sounds” të krijuara nga file-t audio që njerëzit regjistrojnë në shtëpinë e tyre të cilat më pas nxisin një rutinë.
“Le të themi se ju jeni një prind dhe dëshironi që fëmija juaj të bëjë punët e e tij të shtëpisë. Ju mund të trajnoni Alexa për të dëgjuar zhurmën e Xbox që po ndizet dhe më pas të bëni që Echo Show të shfaqë menjëherë listën e punëve të shtëpisë që ato duhet të bëjnë.”
“Në të ardhmen mjaft të afërme pajisjet dhe shërbimet nga të cilat ne varemi do të bëhen më proaktive.” tha Tom Taylor.
Gjatë viteve të fundit Amazon ka filluar të ndërtojë “Routines”, një sekuencë detyrash që lidhen me Alexa dhe me pajisjet e tjera smart që përdoruesit kanë. Pra, përmes këtij shërbimi Alexa do të bëjë të mundur që sa herë të dëgjojë një fëmijë duke qarë të luhet një muzikë qetësuese, të fikë dritat kur nuk ka lëvizje ose të vejë re prezencën e një pakoje në kamera.
