Ditën e djeshme Microsoft publikoi një update të ri i cili rregullon disa nga problemet me performancën që kishin CPU-t AMD. Microsoft dhe AMD zbuluan dy probleme me Windows 11 në proçesorët Ryzen, ku njëra bënte që L3 cache latency të trefishohej dhe të ngadalësonte performancën deri në 15% në disa lojëra.
Update-i i parafundit i Windows i bëri gjërat dhe më keq, mirëpo build-i që u publikua ditën e djeshme 22000.282 do të rregullojë këto probleme. Problemi i dytë prek teknologjinë preferred core të AMD, e cila ndryshon threads drejt core-it më të shpejtë në proçesor. AMD thotë se bug-u i dytë mund të ulë performancën ndërkohë që ju bëni veprime që kryhen nga CPU, dhe për të rregulluar këtë problem AMD ka publikuar një driver të ri me version 3.10.08.506.
Ky update i ri i Windows përfshin gjithashtu një numër të madh rregullimesh, bashkë me zgjidhjen e problemit që pengonte menunë Start që të hapej pasi ju keni upgrade-uar OS dhe problemeve me Bluetooth dhe tastierën. Për më tepër informacione mbi listën e plotë të problemeve që janë rregulluar mund të klikoni këtu.
