Pixel 6 dhe Pixel 6 Pro janë dy ndër pajisjet më të mira që Google ka prodhuar vitet e fundit. Për herë të parë këto smartphone u prezantuan në gusht të këtij viti, mirëpo specifikat e plota u prezantuan vetëm në ditën e sotme.
Google është munduar të sjellë dy smartphone që funksionojnë shkëlqyeshëm për shumicën e përdoruesve Android, duke përmirësuar cilësinë e kamerave dhe njohjen e zërit, por jo vetëm.
Pixel 6 është pajisja me çmimin më të përballueshëm prej $599. Kjo pajisje do të jetë një konkurent direkt i iPhone 13 dhe Samsung Galaxy S21. Google ka përdorur materiale tërësisht të ricikluara për të krijuar trupin e Pixel 6.
Kjo pajisje vjen me një ishull kamerash pak më ndryshe se smartphone-t e tjerë, e cila është tërësisht e drejtë. Ai përbëhet nga kamera kryesore me rezolucion 50MP (sensori më i madh i përdorur ndonjëherë në smartphone-t Pixel) dhe kamera Ultra-wide 12MP. Google pretendon se kamera kryesore është e aftë të fusë 150% më tepër dritë në sensor në krahasim me Pixel 5. Në pjesën e përparme gjendet kamera selfie 8MP.
Ekrani i këtij smartphone-i ka një madhësi prej 6.4” nën të cilin gjendet lexuesi i shenjës së gishtit. Si një produkt bazë, Pixel 6 do të vijë me refresh rate prej 90Hz.
Pixel 6 Pro është i pajisur me një ekran 6.7” QHD LTPO me refresh rate 120Hz i cili harkohet në skaje. Për sa i përket kamerave, përveç kamerave të lartpërmendura, versioni Pro ka dhe një kamera telephoto 48MP që mund të zmadhojë optikisht deri në 4 herë. Gjithashtu dhe kamera selfie në këtë version ka një rezolucion më të lartë prej 11MP.
Pixel 6 Pro vjen me një kapacitet baterie prej 5,000mAh, ndërkohë që bateria e Pixel 6 ka kapacitet 4,614mAh.
Një tjetër lajm shumë i rëndësishëm është dhe përdorimi i proçesorëve Tensor të prodhuar nga vetë Google. Kompania thotë se ai është 80% më i shpejtë se Snapdragon 765G që ndodhej në Pixel 5 të vitit të kaluar. Ky proçesor bën të mundur që proçesimi i imazheve dhe njohja e zërit të përmirësohen ndjeshëm, duke shprehur mjaft qartë ngjyrat e lëkurës të secilit përdorues.
