Përfaqësuesit e Apple gjenden aktualisht në Japoni për të diskutuar me drejtuesit e Toyota në lidhje me prodhimin e makinës elektrike të shumëpërfolur Apple Car duke filluar nga viti 2024, siç përmendet në raportimin e DigiTimes.
Kompania e drejtuar nga Tim Cook ka punuar në një projekt të tillë me emrin “Project Titan” që në vitin 2014. Madje këto plane u pranuan publikisht nga ai në 2017. “Ne po fokusohemi në krijimin e sistemeve autonome, të cilën e konsiderojmë si ‘mamanë e të gjithë projekteve AI’. Sigurisht që makinat elektrike janë një vend mjaft i mirë për të instaluar këto sisteme që do të bëjnë të mundur drejtimin automatik të tyre.” Tha Cook në një intervistë për Bloomberg.
Në muajin shkurt Apple ishte gati të investonte rreth $3.6 miliardë në Kia Motors për të ndihmuar me prodhimin e makinave elektrike në 2024, mirëpo deri më tani nuk ka asgjë zyrtare.
Reuters ka përmendur më parë në artikujt e saj se Apple Car do të përdorte një teknologji të re të baterive, të njohura si monocell, të cilat do të ulnin drastikisht koston e tyre dhe do të rriste distancën që makina mund të përshkojë me vetëm një karikim.
Qëllimi i Apple është që të prodhojë 100,000 makina në vit, të cilat do të kenë një autonomi prej 480 kilometrash dhe do të arrijnë shpejtësinë 100 km/h nga qetësia në vetëm 3.5 sekonda.
