Fëmija i vogël ikonik që ishte fotografuar për cover-in e albumit “Nevermind” të Nirvana është rritur dhe tashmë ka vendosur të padisë këtë grup me pretendimet se kjo fotografi shkel ligjet për pornografinë e fëmijëve.
Spencer Elden është tashmë 30 vjeç, dhe nga kjo betejë gjyqësore ai po pretendon të përfitojë $150,000 nga 17 të akuzuarit, ku përfshihet dhe Courtney Love, ish-bashkëshortja e Kurt Cobain. Në dokumente shkruhet se të akuzuarit shfrytëzuan me qëllim këtë fotografi të Eldenit të vogël për të rritur vëmendjen dhe numrin e shitjeve.
Si rezultat i kësaj fotografie, pretendohet se “Elden ka vuajtur dhe do të vazhdojë të vuajë dëmtime përgjatë gjithë jetës.”
Prindërit e Elden u paguajtën $200 gjatë asaj kohe për fotografinë, por asnjëherë nuk firmosën një letër autorizuese për përdorimin e saj, sipas dokumenteve gjyqësore. Në intervistat e mëparshme Elden ka shprehur mendime të ndryshme mbi fotografinë, por asnjëherë nuk e ka përshkruar atë si një përmbajtje pornografike, ndërkohë që e festonte ekzistencën e saj.
Ai ka gjithashtu një tatuazh “Nevermind” në gjoks dhe ka rikrijuar të njejtën pozë në disa raste të ndryshme për të festuar përvjetorët e ndryshëm të albumit.
