Informacione të reja janë publikuar në internet ku tregohet se Apple ka skanuar email-et në iCloud që në 2019 për materiale ku mund të shfaqet abuzimi i fëmijëve. Këto publikime vijnë vetëm disa javë pasi kompania deklaroi se do të implementonte një sistem të ri në pajisjet e saja si iPhone, iPad dhe Mac i cili do të skanojë të gjitha fotot që gjenden në galeri për përmbajtje abuzimi të fëmijëve.
Këto deklarata kanë ngritur një shqetësim të madh tek përdoruesit në lidhje me mbrojtjen e privatësisë së tyre. Apple tregon se përdoruesit nuk duhet të shqetësohen aspak rreth privatësisë tyre, pasi sistemi nuk “i sheh” fotot e përdoruesve, por arrin të gjejë materialet abuzive përmes një kombinimi të caktuar shkronjash dhe numrash.
Ky vendim e vendos Apple në kundërshtim me strategjinë e saj, ku prej vitesh është munduar të krijojë një emër si kompania më e sigurtë dhe më e besueshme në treg. Më parë Apple ka kritikuar Facebook dhe Google mbi modelet e biznesit të mbështetura në reklamime, duke thënë se kompania gjeneron fitime të mjaftueshme përmes shitjes së smartphone-ve, dhe nuk ka nevojë të mbështetet tek reklamat për më tepër përfitime.
“Nëse ju shikoni kompanitë e tjera që ofrojnë shërbime cloud, do të vini re se ato skanojnë fotot tuaja duke i parë një për një. Ndryshe nga kompanitë e tjera, ne kemi bërë gati një sistem që nuk i sheh fotot tuaja aspak, por i kontrollon përmes një mërtimi të caktuar.” tha Craig Federighi.
