Përmes një postimi në Instagram ditën e hënë Jeff Bezos deklaroi se do të jetë pjesë e ekipit që do të udhëtojë në hapësirë me raketën New Shepard të kompanisë së tij, Blue Origin.
“Që në moshën 5 vjeçare kam ëndërruar të udhëtoj në hapësirë. Në datën 20 korrik, unë do të nisem në këtë udhëtim bashkë me vëllain tim. Aventura më e bukur, me mikun tim më të mirë.” u shpreh Bezos në postimin e tij në Instagram. Ky vendim vjen vetëm 2 javë pasi ai dha dorëheqjen nga pozicioni i CEO, për t’u bërë drejtor ekzekutiv në Amazon.com Inc.
Blue Origin është një ndër kompanitë më të njohura të turizmit hapësinor, bashkë me SpaceX të Elon Musk dhe Virgin Galactic Holdings të Richard Branson.
Për të gjithë personat e interesuar për të marrë pjesë në këtë fluturim, ekziston vetëm një biletë e cila ka dalë në ankand, ku ofertuesi më i madh i momentit është një person me $2.8 milionë. Ankandi do të përfundojë në 12 qershor.
Kompania ka thënë se klientët do të përjetojnë një eksperiencë 4 ditore, duke përfshirë 3 ditë trajnim para fluturimit në kampin e nisjes në Texas. Kapsula hapësinore ka “dritaret më të mëdha në historinë e anijeve kozmike”, sipas website-it zyrtar të Blue Origins, në mënyrë që pasagjerët të kënaqen me pamjet.
