Paraqitja e parë fare e Android 12 për zhvilluesit është fare pranë ndërkohë që pamjet e saj janë këtu dhe le të themi që ka goxha ndryshime.
Në screenshotet e publikuara vihet re se tema kryesore e sistemit nuk është as e bardhë as e zezë, por më shumë në ngjyrë gri shumë të hapur. Kjo sepse ndërfaqja është përshtatur me sfondin në mënyrë që ai të krijojë pak a shumë një temë të vetën, sipas ngjyrave mbizotëruese.
Dritaret e widgets kanë shtuar një kategori të re; “Conversations” për mesazhet më të fundit, telefonatat etj. Edhe lançuesi i Google është në të majtën tashmë.
Perdja e lajmërimeve duket këtu gjithashtu, ajo ka një sfond të mjegulluar dhe ikonat kanë marrë një pamje më të rrumbullakosur goxha ndryshe nga Android 11. Ky sistem do të të njoftojë sa herë që kamera dhe mikrofoni të jenë në përdorim në formën e një rrethi me ngjyrë të dedikuar në pjesën e sipërme, besohet se në varësi se ku ndodhesh në ndërfaqje ai do të zvogëlohet në një pikë.
Një ndryshim goxha i ndjeshëm është edhe ndërfaqja e kamerës e cila qenka rimenduar totalisht.
Nëse do i referohemi traditës Developer Preview e parë fare do të vijë nga fundi i këtij muaji.
