Ditë e bukur për të ardhmen e Tiranës por edhe gjithë Shqipërinë. Vendi ynë ka pasur gjithmonë mungesa sa i takon vëmendjes së përqëndruar drejt programimeve të ndryshme, për video-lojra, animacione, filmografi, robotikë etj. Të paktën kur janë të organizuara nga instancat qeverisëse. Gjërat ndyshuan më në fund me ardhjen e Tumo, qendra e mësimit për të rinj nga 12 deri në 18 vjeç pikërisht për këtë sektor. Gjërat duket se kalojnë në një nivel tjetër pasi selia e qendrës do i nënshtrohet ndryshimit rrënjësor.
E kemi fjalën sigurisht për Piramidën, ish mazoleumin e Enver Hoxhës, një ndërtesë e lënë në harresë ndër vite e cila do të vihet në shërbimin e një qëllimi për të cilin jemi entuziast. Albanian – American Development Foundation ka postuar një video ku tregon nisjen e punimeve të ndërtesë, të prezantuara nga Winy Maas, bashkë-themeluesi i MVRDV ,zyra përgjegjëse për design-in e ndërtesës së re.
Ndër të tjera ai foli për mënyrën si do të përdoren hapsirat e brendshme dhe të jashtme, ajo do të jetë e aksesueshme për të gjithë. Madje edhe pjesa e sipërme e saj do të përdoret për studim apo socializim mes kujtdo që do të vijë mësojë aty. Ai e përshkruan atë si një fshat të vogël me dhoma të veçanta dedikuar zhvillimit të shkencave dhe teknologjisë të brezave të rinj.
