Kur Apple hoqi vrimën e kufjeve nga iPhone të gjithë e tallën, por më pas u bënë pjesë e trendit. Tani që karikuesi dhe kufjet u hoqën nga kutia, përsëri kompanitë e tjera e tallën, por ashtu siç pritej të gjitha do e kopjojnë.
E para kompani që bëhet pjesë e trendit është as më pak e as më shumë por vetë Samsung. Sipas regjistrimit të produktit në Brazil, S21 do të vijë pa një adaptor për karikim dhe pa kufje. Zhurma të tilla qarkullonin që në tetor por letrat e regjistrimit e konfirmojnë se të treja kutitë e modeleve të kësaj gjenerate të Galaxy S do të peshojnë më pak.
Teksti në portugalisht demonstron se testet janë kryer me adaptorë 25W çka tregon maksimumin e fuqisë me të cilën do të karikohen, adaptorë të cilët Samsung do të jetë më se e lumtur të na i shesë në mënyrë të veçantë. Sigurisht që kompania do ta shesë këtë lëvizje si një përpjekje për të minimizuar mbetjet elektronike, a ka mënyra të tjera më efikase e më pranë klientit? Padyshim që po, por Big Tech Companies dhe praktikat e shfrytëzimit nuk janë diçka e re për konsumatorin.
Edhe një herë tjetër Apple vendos një trend në botën e smartphonëve. Kush do tallet me kë tani?
