Mënyra si ndajmë materiale me njëri tjetrin ka ndryshuar. Të mendosh që një kohë kishim gjithë durimin e botës teksa mbanim bashkuar dy telefona për të kaluar foto e video me anë të InfraRed, ndërsa sot as Bluetooth-in nuk e konsiderojmë, preferojmë rrjetet sociale. Alternativë efikase për fotot e audio por jo për të kaluar video. Sidomos ato të gjata, me rezolucion të lartë e përmasa të mëdha.
Në këtë rast i drejtohesh shërbimeve cloud, ka tre mënyra si mund ta bësh këtë në një smartphone Android.
E para është sigurisht Google Photos. Aplikacioni ka një opsion automatikisht të aktivizuar i cili ruan në cloud çdo gjë që ti shkrep me kamera. Marrësi mundet ta marrë videon me anë të një link-u. Ja si bëhet:
1. Futu tek Google Photos.
2. Zgjidh videon dhe mbaje shtypur derisa të shfaqet opsioni “Share“, trokit mbi të.
3. Në tabelën pasardhëse zgjidh “create a link“.
4. Me ta zgjedhur atë sistemi duhet të të njoftojë se linku është kopjuar.
5. Bëje “paste” tek chat-i i marrësit.
E dyta është shërbim i Samsungut. Eshtë gati e njëjta gjë dhe proçes por në ndryshim nga Google, materiali nuk ruhet përgjithmonë në cloud, ndaj nuk do të të duhet hapësirë online e disponueshme. Në vend të kësaj Samsung krijon një link të përkohshëm.
1. Futu tek galeria e smarptohonit.
2. Mbaje videon shtypur derisa të shfaqet opsioni i shpërndarjes dhe përzgjidhe atë.
3. Në listën e aplikacioneve zgjidh “Link Sharing”
4. Tek tabela tjetër zgjidh “Copy” e më pas bëje paste tek aplikacioni që dëshiron.
E në fund nëse për ndonjë arsye nuk të pëlqen të përdorësh Google Photos, ekzistojnë mjaft shërbime të tjera për hapësirë digjitale që bëjnë të njëjtën gjë. Dy alternativa të mira janë Dropbox dhe OneDrive. Të dyja kanë opsionin e ruajtjes automatike në cloud. Me të shkarkuar e instaluar në smartphone ndiz opsionin automatik dhe shpërndaje videon nga brenda aplikacioneve.
