Nuk e dimë nëse është e ndikuar nga kriza aktuale apo jo por duket se në këtë reçes ekonomik të gjitha shtetet u janë sulur kompanive të mëdha të teknologjisë me gjoba e gjyqe në seri.
E radhës është Italia e cila ka gjobitur Apple me 10 milion euro me arsyetimin se deklaratat e kompanisë sa i përket rezistencës ndaj ujit për iPhonët e saj nuk janë reale. Sipas autoriteteve rregulatore të konkurencës së tregut italian, kompania ka marketuar një sërë produktesh të veta si rezistente ndaj ujit, në 4 metra thellësi për një kohë prej 30 minutash.
Testet në laboratore u performuan në disa seri të smartphonit nga gjenerata 8 deri tek iPhone 12. Rezultatet flasin kundër Apple. Autoritetet thonë madje se testet u performuan vetëm në ujë të ëmbël e jo në kushte të jetës së përditshme.
Nga ana tjetër praktika e mos mbulimit nga garancia të dëmeve nga uji shihen si agresive.
Vetë Apple ende nuk ka reaguar, e për hir të së vërtetës gjyqet për të nuk kanë munguar këto kohë.
