Kohët e fundit WhatsApp nuk po di të ndalet me përditësimet. Pas mesazheve që zhduken automatikisht dhe strumentave të reja për menaxhimin e memories mbërrijnë dy ndryshime të rëndësishme, njëri për Android tjetri për iOS.
Pikasur nga WABetaInfo, fansat e sistemit operativ të Google do të kenë mundësinë të zgjedhin midis 32 sfondeve të bardhë dhe 29 të tjera për modalitetin e errët. Ç’është më kryesorja, secili chat mund të personalizohet me sfonde të ndryshëm.
Ndërsa për përdoruesit e iPhonëve do të vijë funksioni “Read Later“, (lexo më vonë) i cili do të zëvendësojë butonin e arkivës. Me të aktivizuar këtë funksion të ri chati i përzgjedhur do të fshihet dhe mesazhet e njëpasnjëshme që vijnë aty nuk do të të lajmërojnë më. Ama me të hapur përsëri bisedën të gjitha mesazhet do të vijnë njëherësh.
Mes gjithë këtyre përditësimeve mbetemi padyshim në pritje të më të rëndësishmit, atij të përdorimit nga disa pajisje njëkohësisht. WhatsApp e ka konfirmuar ardhjen e tij me kohë, por datën ende jo.
