Që interneti mund të kthehet fare lehtë në një vend të rrezikshëm është pjesë e njohur e realitetit, ama ka disa momente ku rreziku kthehet në një trend dhe shenjestra e tij janë ata më të pambrojturit: fëmijët.
Disa vite më parë Balena Blu dhe MOMO u shfaqën me shpejtësi nëpër rrjet dhe morën vëmendjen e autoriteteve vetëm pasi serioziteti i tyre filloi të manifestohej në formën e viktimave vërdallë nëpër glob. Profile false në të dyja emërtimet e mësipërme shfaqeshin në rrjete sociale dhe i shkruanin mesazhe përdoruesve kryesisht të rinj në moshë duke i ftuar të luanin një lojë. Në ndonjë rast duke u dhënë ndonjë link, i cili me shumë mundësi kishte teknologji gjurmuese duke mësuar kështu vendndodhjen e viktimës ose më saktë zonën apo rajonin.
Nëse strategjia e linkut nuk funksionon, keqbërësi do të kërkonte për informacione rrethanore,(emra familjarësh, shoqërie etj) më pas do ti përdorte si shantazh për ta detyruar për të plotësuar një sërë sfidash.
Sfidat varionin nga ndryshimi i ciklit të gjumit, tek gjymtimi i vetes apo deri tek vetvrasja.
Vetëm në Rusi raportohen të paktën 100 jetë të humbura nga Balena Blu.
Në rrjete sociale kryesisht të ndjekura nga të rinjtë si TikTok, Instagram dhe Twitter, profile me emrin Jonathan Galindo dhe me foto apo video të një personi maskuar si qen po ndjekin të njëjtën veprimtari të përshkruar më sipër.
Prindër kontrolloni fëmijët dhe fëmijë mos u shqetësoni, ja çfarë fshihet pas atij profili:
Së pari fotot janë të vjedhura. Personi i vërtetë pas tyre është një person me emrin Samuel Canini i cili madje ka reaguar në Twitter ku thotë se fotot dhe videot janë që nga viti 2012 – 2013 makiazhi dhe personazhi i krijuar janë totalisht për zbavitje personale jo për të tmerruar njerzit.
Hello everyone. This Jonathan Galindo madness seems to be terrorizing a great many young impressionable people. The photos and videos are mine from 2012-2013. They were for my own weird amusement then, not for some modern day thrillseeker looking to scare and bully people.
— Dusky Sam (@DuskySamCat) July 3, 2020
Së dyti, ky nuk është as një robot dhe asnjë lloj programi i avancuar, përkundrazi prapa atyre profileve fshihen persona të tjerë të cilët nuk kanë gjë tjetër më të mirë për të bërë dhe merren me idiotsira të tilla.
Ata nuk dinë asgjë për ty dhe të jesh i bindur nuk mund të të bëjnë asgjë nga rrjeti social nga ku po të kontaktojnë.
Çfarëdo linku të kesh klikuar maksimumi ai mund të dijë nga cili qytet apo shtet je duke klikuar, jo vendndodhjen e saktë, sidomos në shqipëri ku IP-të në pjesën më të madhe të kohës nuk janë as personale.
Nëse të përmend ndonjë detaj konkret me shumë mundësi ka kërkuar vërdallë nëpër profilet e tu të tjerë në internet, ose të njeh personalisht.
Dhe së fundmi, nëse vërtetë je i shqetësuar kontakto Policinë e Shtetit, ndryshe nga Jonathan Galindo, autoritetet i kanë strumentat e duhura për të gjurmuar çdo aktivitet kompiuterik online brenda republikës së vetë, deri edhe tek vendndodhja e saktë. Ndaj një denoncim i yti dhe i prindit tënd do ti hapte telashe kujtdo që tenton të të mashtrojë.
Nëse përdoruesi i profilit jeton jashtë, do të bllokohet dhe do të njoftohen autoritetet përkatëse, nëse ai ndodhet brenda vendit tonë e pret burgu pasi krimet kompiuterike janë të dënueshme edhe këtu, madje goxha rëndë.
