Skena gjigande e super eventit WWDC nuk rezultoi më imune se të gjitha skenat e tjera të 2020-ës ndaj edhe Apple prezanton iOS 14 nëpërmjet live streaming pak orë më parë.
Ndryshime të dobishme, rrënjësore por ndonjëra syresh e ndeshur edhe më parë në botën e smartphonëve.
Widgets më në fund vijnë në Home Screen. Pas 14 gjeneratash më në fund Apple kupton rëndësinë e tyre e madje e e çon një hap më tej me “Smart Stack” një opsion që shfaq automatikisht aplikacionin e duhur në varësi të orës së ditës.
App Library organizon aplikacionet jo vetëm duke i grupuar siç i shohim tani në të gjitha OS-ët mobile. iPhone më në fund të lejon ti fshehësh aplikacionet nga home screen, por të grupuara ama, jo plotësisht.
Përdoruesit e iOS më në fund do të marrin një tjetër shije të multi-tasking nëpërmjet videove picture-in-picture e cila do të lejojë të vazhdosh ta shohësh kontentin duke krijuar një dritare më të vogël, ndërkohë që kryen detyra të tjera.
App clip do të lejojë të përdorësh një funksion specifik të një aplikacionit, pa pasur nevojën të instalosh të atë. Duke përdorur etiketa NFC dhe një kod QR të ri specifikisht për Apple gjithçka mund të përdoret pa krijuar llogari të reja, pa instaluar gjë madje funksionon edhe me Apple Pay. Shërbimin e një parkingu apo kafeneje mund ta paguash edhe me iPhonin tënd pa shkarkuar gje pa llogari dhe pa e nxjerre portofolin fare nga xhepi.
Sensacioni i deri para disa viteve, Siri do të pësojë ndryshime vërtetë të nevojshme kësaj here. Kur të thërritet nuk do të zërë më gjithë ekranin por një shirit në pjesën e poshtme e gjithashtu mund të dërgojë mesazhe zanore jo vetëm të diktuara. Apple thotë gjithashtu se në krahasim me tre vjet më përpara Siri di 20 herë më shumë fakte, ndaj le të vërshojnë pyetjet e çuditshme.
Translate app do të përkthejë më në fund. Përdoruesit mund të diktojnë ose shkruajnë tekstet e tyre dhe ti përkthejnë deri në 11 gjuhë, Anglisht, Mandarin Kineze, Frengjisht, Gjermanisht, Spanjisht, Italisht, Japonisht, Koreane, Arabisht, Portugisht dhe Rusisht. Njësoj si në Google Translate me anë të një butoni aplikacioni detekton gjuhën dhe përkthen në kohë reale atë çka ai i huaji të tha ty turistit larg vendlindjes.
Apple Maps gjithashtu i nënshtrohet ndryshimeve, përveç shërbimit të rekomandimeve hartat do të jenë më miqësore me çiklistët, duke dhënë drejtime të dedikuara, për vozitje biçiklete, përfshi maloret, shtigjet, shkallët dhe korsitë. Qytetet e para me këtë informacion do të jenë New York City, San Francisco Bay Area, Shanghai dhe Pekini. E së bashku me të pafund opsione për lidhjen me makinën, stacionet e karikimit por ajo më ekzotikja ka të bëjë me kalimin e çelësit në smartphone, dhe faktin që një pjesë e dedikuar e smartphonit do të funksionojë për të hapur e mbyllur makinën edhe nëse smartphonit i ka rënë bateria. Një seksion i veçantë do të reziszoje deri në 5 orë pas fikjes.
Në përgjithësi duket si një vit i mirë për të blerë një iPhone. Me ndryshime jo vetëm në pamje por edhe në lehtësi, opsione shtesë dhe implementim i AI, duket se ky iOS do të jetë më miqësor se kurrë.
iOS 14 do të dalë këtë vjeshtë dhe do të mbështesë nga iPhone 6S e më tej.
