Samsung ishte ndër të parët që guxoi me smartphonët e lakueshëm. Galaxy Fold teorikisht ishte një projekt vërtetë ambicioz por ekzekutimi la mjaft për të dëshiruar, i stërmadh, delikat dhe rrudhat të dukshme në ekran.
Galaxy Z Flip nga ana tjetër rezultoi një sukses, shumë mangësi të Fold u përmirësuan tek ky smartphone më i vogël e më solid. Prandaj edhe shitjet ishin ku e ku më mirë. A do ti shohim këto përmirësime të reflektuara tek Fold 2?
Ndërsa presim eventin e gushtit ku aparati do të vijë bashkë me Note 20 dhe Z Flip 5G, një leak na zbulon disa detaje për dimensionet e rimenduara të Fold 2.
Ekrani i lakueshëm do të jetë 7.7-inch, ndërsa ai i jashtëm 6.23-inch. Kujtojmë që Fold 1 ishte 7.3 me 4.6, pra goxha më ambicioz i dyti.
Ekrani i madh do të ketë raport rifreskimi 120Hz dhe do të përbëhet nga Samsung Ultra Thin Glass, jo totalisht xham pasi do ishte e pamundur palosja por një përzjerje me plastikën.
Notch-i masiv do të zëvendësohet nga hole-punch camera për selfie dhe sensorët.
Ekrani më i vogël do të ketë një raport rifreskimi më të ulët 60Hz, do jetë prej xhami dhe do të ketë hole-punch camera.
Sipas raportit Samsung pritet të prodhojë 300,000 Fold 2 në muaj dhe parashikohet të shesë 3 milion njësi në vit.
Eventi i lançimit Unpacked do të jetë online në datë 5 Gusht.
