Muaj më parë bota e teknologjisë u çudit edhe një herë nga Apple dhe super kompiuteri i tyre i cili në konfigurimine plotë mund të arrijë deri në $52,000.
Dhe pavarësisht mrekullive inxhinierike të përfshira brenda kutisë së Mac Pro lajm përbëri fakti që mbajtësja e ekranit u prezantua për $1000. Sikur kjo të mos mjaftonte, një set me 4 rrota për Mac-un kushton $700. Së fundmi kanë filluar edhe shitjet veçmas konfigurimit të plotë.
Si fillim ku do e çosh kompiuterin me ato rrota, pasi një PC është i projektuar të futet në prizë dhe të mos lëvizë nga vendi.
Çmimvënia e Apple nuk ka qenë gjithmonë vetëm për produktin por edhe për statusin që kompania do ti japë vetes.
Por kjo nuk ka ndaluar krijuesit e YouTube që të vënë mendjen në punë.
I pari ka qenë kanali Unbox Therapy. Moderatori Lew i famshëm për lakimin e iPhone 6, ka pasur idenë brilante që të bëjë një skateboard nga rrotat 700 dollarëshe dhe grila e përparme e Mac Pro. Një konfigurim goxha i shtrenjtë por që veç dy tre xhirove të thjeshta asgjë tjetër nuk mund të bësh.
Profesionistët më pas kanë marrë situatën në dorë dhe na sjellin një iSkateboard. Nëse edhe ti je duke lënë brinjët rrugëve në përpjekje që të mësosh skate Braille Skateboarding dhe Aaron Kyro janë padyshim ndër 5 idhujt e tu të sportit.
Aaron i mësuar me rrota bazë të skate shpesh jo më të shtrenjta se $50 seti, u përball me sfidën e krijimit të boardit të plotë më të shtrenjtë ndonjëherë.
Pjesa e parë e videos është montimi i dërrasës me iRrotat, një detyrë jo fort e vështirë. Pjesa tjetër është ferri vetë.
Të vozisësh me të është pothuaj e pamundur pasi aftësia e rrotave për tu rrotulluar 360° dhe në mënyrë të pavarur nga njera tjetra e bëjnë të pamundur gjetjen e drejtimit.
Ndonëse ndonjë stil statik edhe mund të realizohet pjesa tjetër është e pamundur.
Në përfundim rrotat duken goxha solide, pasi i rezistojnë më së miri të gjitha keqtrajtimeve nga Braille, çka të paktën na qetëson një pjesë të $700 të harxhuara.
Ndaj nëse po mendoheshe këto kohë cilën të blije mes iPhone SE dhe rrotave të Mac ja ku e ke një argument më shumë.
