Bryan Johnson, sipërmarrësi amerikan i teknologjisë i njohur për eksperimentet e tij ekstreme kundër plakjes, ka zbuluar se është diagnostikuar me gastrit autoimun, një sëmundje kronike ku sistemi imunitar sulmon mukozën e stomakut. Lajmin e bëri publik përmes Instagramit, duke thënë se kjo gjendje ka bërë që stomaku i tij të “fillojë të hajë vetveten“.
Johnson, protagonisti i dokumentarit të Netflix Don’t Die: The Man Who Wants to Live Forever, shpjegoi se AIG prek rreth 2–5% të popullsisë, por numri real mund të jetë më i lartë pasi sëmundja është e vështirë të diagnostikohet në fazat e hershme.
Megjithëse konsiderohet e pashërueshme, miliarderi nuk ka ndërmend të dorëzohet. Ai deklaroi se do të përpiqet ta “zgjidhë” këtë sëmundje duke shfrytëzuar teknologjitë më të avancuara, përfshirë inteligjencën artificiale, analizat multiomike dhe terapitë e personalizuara gjenetike, ndërsa premtoi se do të ndajë publikisht çdo zbulim gjatë këtij procesi.
Johnson është bërë i famshëm për rutinën e tij të kushtueshme, e cila i kushton rreth 2 milionë dollarë në vit. Në të kaluarën ai ka eksperimentuar me transfuzione plazme nga djali i tij adoleshent, konsumonte mbi 50 suplemente çdo ditë dhe testonte vazhdimisht trajtime të reja për të ngadalësuar plakjen biologjike.
Sipas tij, një nga shenjat kryesore që çoi në diagnozë ishte niveli shumë i ulët i ferritinës për më shumë se një dekadë. Edhe pse ndiqte një dietë vegane dhe merrte suplemente hekuri, analizat nuk përmirësoheshin. Diagnoza u konfirmua vetëm pas një kolonoskopie, endoskopie dhe pesë biopsive të stomakut.
Johnson beson se dieta e varfër gjatë fëmijërisë dhe stresi i viteve të ndërtimit të kompanisë së tij mund të kenë ndikuar në shfaqjen e sëmundjes, edhe pse shkencëtarët theksojnë se shkaqet e sëmundjeve autoimune lidhen kryesisht me faktorë gjenetikë dhe mjedisorë.
Pasi fitoi mbi 300 milionë dollarë nga shitja e kompanisë Braintree te PayPal në vitin 2013, Johnson ia ka kushtuar jetën kërkimit për të zgjatur jetëgjatësinë. Tashmë, sfida e tij më e madhe nuk është vetëm të ngadalësojë plakjen, por të provojë se edhe sëmundjet që sot konsiderohen të pashërueshme mund të trajtohen me teknologjitë e së ardhmes.
