Kodimi është kthyer në një nga përdorimet më të forta të modeleve gjuhësore të mëdha, dhe duket se Google po kërkon ta çojë këtë avantazh një hap më tej. Sipas një raportimi nga 404 Media, kompania ka nisur në heshtje një program “konfidencial” për të blerë kod real nga zhvillues të aplikacioneve në Google Play Store, me synimin për të trajnuar dhe përmirësuar modelet e saj të inteligjencës artificiale.
Programi, i quajtur “confidential content offer pilot”, u është prezantuar zhvilluesve përmes një emaili ku Google e pozicionon iniciativën si një mundësi për të gjeneruar të ardhura shtesë nga aplikacionet e tyre. Interesante është se emaili nuk përmend drejtpërdrejt fjalën “AI”, por thekson se kodi do të përdoret për të “përmirësuar mjetet dhe produktet për zhvilluesit”, duke i lidhur zhvilluesit me një faqe mbi partneritete për përmirësimin e produkteve AI të Google.
Sipas mesazhit, Google kërkon kode cilësore dhe reale, qoftë baza aktive e aplikacioneve që janë ende në përdorim, apo projekte të vjetra, prototipe dhe side-projects të arkivuara. Në këmbim, zhvilluesit do të paguhen dhe do të kenë rolin e “early adopters”, duke ndikuar në mënyrën se si Google do të bashkëpunojë me komunitetin e zhvilluesve në të ardhmen.
Ndërsa kompanitë e mëdha të teknologjisë kanë përdorur për vite me radhë përmbajtje publike për të trajnuar modelet e tyre AI, kjo përmbajtje rrallëherë është paguar. Ndryshe nga artikujt apo postimet online, kodi i aplikacioneve Android është zakonisht privat dhe jo i publikuar plotësisht, çka e bën këtë marrëveshje më të ndjeshme, por edhe më të vlefshme.
