Aktiviteti kryesor i këtyre ditëve mbetet lëvizja e syve nga njëri ekran tek tjetri, sa tek smartphoni tek PC, sa tek PC tek televizori e kështu me radhë. Ky rreth vicioz tashmë nuk mund të bëjë pa internetin, internetin e vyer të cilit kaq shumë po ia kemi nevojën sa për argëtim aq edhe për punë.
Mirëpo gjithë kjo ngarkesë sigurisht që nuk është pozitive, gjigandë si YouTube apo Netflix kanë ulur cilësinë e shërbimeve të tyre vetëm që të përballojnë fluksin e madh. Sidoqoftë edhe vetë ne në shtëpitë tona mund të bëjmë disa ndryshime që do të reflektohen në cilësi padyshim.
Ndaj Geek Room sjell 5 mënyra se si mund të kesh internet më të mirë:
1. Pozicioni i routerit
Jo të gjitha dhomat janë projektuar në mënyrë të barabartë, në fakt dhoma ku pozicionohet routeri ndikon në mënyrë direkte në shpejtësinë e internetit. Shmang muret, sa më në qendër të shtëpisë aq më e barabartë shpërndarja e sinjalit. Zakonisht varet goxha nga pozicioni i prizës së internetit, por investo në pak metra kabull për ta vënë routerin në qendër dhe larg pengesave qofshin këto libra apo orendi, përveçse pengojnë sinjalin, pengojnë edhe ventilimin e aparatit.
2. Bëje update
Routeri yt krahas anës hardware-ike ka edhe një software i cili ndonjëherë kërkon përditësim. Mjafton të gjesh modelin e aparatit, futu tek faqja zyrtare e kompanisë prodhuese dhe kërko për versionin më të fundit të sistemit të routerit.
3.Ndërro frekuncën
Interferenca e sinjaleve të tjera është goxha problem, sidomos në ambiente të populluara.
Nëse ke një router dual-band kontrollo në cilën frekuencë po operon. Shkarko aplikacionin e kompanisë dhe provo të përdorësh bandin 5Ghz në vend të atij më të zakonshëm 2.4Ghz. Do të kesh më pak interferenca por edhe më shumë shpejtësi.
Megjithatë, duhet thënë që mbulimi 5Ghz është shumë më i mbledhur sesa 2.4Ghz ndaj kjo aplikohet kryesisht në ambiente më të vogla.
4. Shto një antenë
Nëse routeri yt ka një antenë të brendshme opsioni i shtimit të një tjetre të jashtme do të sjellë vetëm të mira. Mjaft kompani shesin antena shtesë të cilat i gjen lehtësisht kudo, ka dy lloje: omnidirectional të cilat shpërndajnë valë njësoj në të gjitha drejtimet, dhe direcrional të cilat shpërndajnë andej nga drejtohen, ndaj nëse njëra nga dhomat vuan më shumë drejtoje andej.
5. Bli një zgjatues sinjali
Nëse ke një ambient goxha të madh dhe asnjëra nga alternativat e sipër përmendura nuk bën punë, një zgjatues sinjali do ishte zgjidhje e mirë. Routeri yt mund të mbulojnë një distancë të caktuar, krevati ndoshta është më larg se kufiri, ndaj vendoset një aparat i tillë midis routerit dhe zonës së errët. Sinjali nuk do të jetë njësoj si ai i burimit të parë lor është më mirë se asgjë, nëse e lidh me një kabull direkt do të ishte zgjidhje ideale.
